Гаитидаги зилзила қурбонлари сони 1941 кишига етди, жароҳатланганлар эса 9 мингдан кўп. Бу ҳақда республика Фуқаро муҳофазаси бошқармасига таяниб CNN хабар берди.
«17 август ҳолатига кўра, Фуқаро муҳофазаси бошқармаси 1941 кишининг ўлимини қайд этди: 1597 киши — Жануб департаментида, 205 киши Гранд-Анс департаментида, 137 киши Нипп департаментида ва икки киши Шимоли-ғарб департаментида. Шунингдек, 9 мингдан ортиқ ярадорлар рўйхатга олинди », — дейилади бошқарма баёнотида.
Расмийларга кўра, минтақадаги 100 мингдан ортиқ бино тўлиқ ёки қисман вайрон бўлган; айни пайтда қутқарувчилар вайроналар остидан одамларни қидиришда давом этмоқда.
Ҳафта бошида Гаити қирғоқларига урилган «Грэйс» тропик бўрони туфайли қидирув-қутқарув ишлари вақтинча тўхтатилганди. Бўрон мамлакатнинг жануби-ғарбий қисмига — зилзиладан энг кўп зарар кўрган ҳудудларга таъсир қилган.
Агентлик маълумотларига кўра, жабрланганларнинг кўпчилиги иссиқда тиббий ёрдамни узоқ кутиб қолмоқда, чунки соғлиқни сақлаш тизими бунчалик кўп ярадорларга дош бера олмаяпти.
CNN ЮНИСЕФга таяниб хабар беришича, Гаитидаги зилзиладан 1,2 миллионга яқин одам зарар кўрган, уларнинг деярли ярми болалар. «Грэйс» бўрони эса сув, уй-жой ва бошқа асосий хизматлардан фойдаланишни янада мураккаблаштирмоқда.
«Зилзила туфайли ҳамма нарсасидан маҳрум бўлган сон-саноқсиз оилалар ҳозир тошқин туфайли том маънода сувга чўкиб кетди», — деди ЮНИСЕФнинг Гаитидаги вакили Бруно Маэс.
Гаитида 14 август, шанба куни 7,2 магнитудали зилзила юз берганди. Унинг кетидан кетма-кет афтершоклар, хусусан, 5,2 магнитудали такрорий ерости силкинишлари кузатилган. Зилзила эпицентри пойтахт Порт-о-Пренсдан 125 километр ғарбда жойлашган. Гаити бош вазири Ариэль Анри мамлакатда бир ойлик фавқулодда ҳолат эълон қилди.
Аввалроқ қурбонлари сони 1297 кишига, кейинроқ 1419 кишига етгани, уларнинг сони яна ошиши мумкинлиги хабар қилинганди.
Изоҳ (0)