Ижтимоий тармоқларда янги ўқув йилида таълим жараёнининг анъанавий (офлайн) тарзда бошланиши ҳақида тарқалган хабарлар юзасидан Олий ва ўрта махсус таълим вазирлиги муносабат билдирди.
Маълум қилинишича, Олий ва ўрта махсус таълим вазирлиги томонидан олий таълим муассасаларининг пандемия шароитида санитария-гигиена қоидаларига риоя қилган ҳолда таълим жараёнини анъанавий (офлайн) тарзда ташкил этиш бўйича тайёргарлик ҳолати ўрганилмоқда.
Ўрганишлар натижасига кўра тегишли маълумотлар Вазирлар Маҳкамасига тақдим этилади. Олий таълим муассасаларида таълим жараёнини ташкил этиш юзасидан якуний хулоса тасдиқлангандан сўнг, вазирлик сайти ва ижтимоий тармоқларидаги саҳифалари орқали расмий тарзда эълон қилинади.
Олий ва ўрта махсус таълим вазирлиги талабалардан пандемия шароитида санитария-гигиена қоидаларига қатъий риоя қилишларини, уларнинг ота-оналаридан ҳам фарзандлари соғлиғига масъулият билан қарашлари ва, албатта, вакцинация жараёнида фаол иштирок этишларини сўраган.
«Эмлаш талабаларнинг яхши билим олишлари билан бир қаторда ўзлари ҳамда профессор-ўқитувчиларнинг ҳам соғ-саломат бўлишини таъминлайди», – дейилади хабарда.
Бундан аввал Ўзбекистондаги ОТМларда ўқиётган талабаларнинг неча фоизи қизлар экани, Янги Ўзбекистон университетига кириш имтиҳонлари сентябрь бошида ўтказилиши ҳамда Ўзбекистонда 6-синфдан аъло баҳога ўқиган ва хулқи яхши бўлган мактаб битирувчилари ОТМга имтиҳонсиз кириши мумкинлиги ҳақида хабар берилганди.
Изоҳ (0)