Фото: Тошкент орқали эвакуация қилинаётган Европа Иттифоқи ва Афғонистон фуқаролари

Германия Қуролли Кучлари (Бундесвер)нинг иккита А400М самолёти Кобулдан Тошкентга 400 дан ортиқ одамни эвакуация қилди, деб хабар берди Германия Мудофаа вазирлиги Twitter саҳифасида.

«Тошкент ва Кобул ўртасидаги ҳаво кўприги, Кобулда хавфсизлик ҳолати бунга имкон бергунига қадар, эвакуациянинг жадал давом этишини таъминлайди.», — дейилади Германиянинг Ўзбекистондаги элчихонаси хабарида.

Белгиланган фуқароларнинг эвакуация қилинишини таъминлаш учун Ўзбекистон томони алоҳида терминал ажратди. Шу сабабли «Тошкент-3» аэропорти номаълум муддатга ёпилди.

Эвакуация қилинганлар Тошкентдан Германияга Lufthansa рейслари орқали юборилади. Ташқи ишлар вазирлигининг расмий вакили ахборотига кўра, эвакуация қилинганларнинг барчаси Германияга кетгунга қадар аэропорт транзит ҳудудида бўлади.

17 август куни Германия Қуролли Кучларининг (Бундесвер) иккинчи эвакуация самолёти 125 нафар йўловчи билан Афғонистондан Тошкентга учиб келган. Самолёт Кобулдан ҳавога кўтарилиши билан Германия Мудофаа вазирлиги Twitter’даги саҳифасига Airbus А400М Кобулдан Тошкентга қайтаётгани ҳақида хабар қилган.

Хабарда бортда Германия фуқаролари, маҳаллий афғон ходимлари ҳамда «ҳимояга муҳтож бошқа шахслар» борлиги таъкидланган. «Авиаташувлар бошланди ва бу хавфсизлик билан боғлиқ вазият тақозо этгунига қадар давом этади», — деб ёзади Германия ташқи ишлар вазири Хайко Мас.

Германия ҳукумати Афғонистондан одамларни эвакуация қилиш операцияси узлуксиз давом этиши учун барча имкониятларни ишга солмоқчи. Бундесвер 17 августда Кобулдан Тошкентга яна иккита эвакуация рейсини режалаштирган, дейди Хейко Мас. Унинг сўзларига кўра, иккита Airbus А400М самолётидан ташқари, АҚШ Ҳарбий ҳаво кучларининг машиналари ҳам жалб қилинади.

Германия Мудофаа вазирлиги маълумотларига кўра, иккита Airbus А400М эвакуация самолёти Кобулдан Тошкентга бир неча марта қатнайди.

«Шундай қилиб, биз имкон қадар кўпроқ ҳимояга муҳтож одамларни Афғонистондан эвакуация қилишни таъминлаймиз», – дейилади хабарда.