Қарши шаҳрида содир бўлган мудҳиш қотиллик ҳақида гапирган воқеа гувоҳлари 102 қисқа рақамларига хабар берилганидан сўнг, ИИБ ходимлари воқеа жойига 40-45 дақиқада етиб келганини, шу боис қотилликнинг олди олинмаганини айтмоқда. Бу ҳақда «Дарё» мухбири билан суҳбатлашган суҳбатдош 102 қисқа рақамларига қилинган қўнғироқлар вақтини ҳам кўрсатди.
«102 га шахсан ўзим уч марта қўнғироқ қилдим. Воқеа ҳақида айтиб, тез етиб келинг, ҳозир ўлдириб қўйишади, дедим. Хўп, ариза қабул қилинди, ёзиб олдик, дея менга қўполлик қилишди. Келаверишмагач, 09:51 да яна телефон қилдим. Яна келишмагач, соат 10:11 да яна тердим. Ҳеч бўлмаса рация орқали хабар бериб, номерсиз қора Gentra’ни ушланглар, дедим. Хуллас, ИИБ ходимлари воқеа ҳақида хабар берилганидан сўнг ҳам 40-45 дақиқа ўтгач келишди. Улар келишганда эса, безори болалар йигитни яримжон ҳолатда машинага тиқиб олиб кетишганди. Атрофда кўпчилик бор эди, аммо ҳеч ким ёрдам бермади. Мен ҳам қиз бола бўлганим учун йигитларнинг қўлидаги пичоқни кўриб, ёрдамга боролмадим», — дейди исм-шарифи сир қолишини сўраган суҳбатдош.
Суҳбатдошнинг айтишича, ИИБ ходимлари ўз вақтида етиб келганида мудҳиш қотилликнинг олди олинган бўларди.
«Ҳеч бўлмаса номерсиз машина ортидан тушиб, чалажон бўлса-да, ўша йигитни олиб қолишарди. ИИБ ходимлари воқеа жойига етиб келишгунча безорилар йигитни Чироқчи туманининг Еттитом қишлоғига олиб кетишган. Ходимларнинг шунчалик секин ҳаракатланиши оғир оқибатларга олиб келди», — дейди воқеа ҳақида гапирган гувоҳ.
Суҳбатдошнинг маълумот беришича, кўпчилик томонидан калтакланган Элбек Раҳимов кўп қаватли уйлар томондан, профилактика инспекторининг хизмат уйи рўпарасидаги панжарадан сакраб ўтган ва кўчага йиқилган. Темир жисм билан урилган Элбек атрофга нажот кўзи билан боққан. Аммо ҳеч ким ёрдамга келмаган.
«Биз воқеа ҳақида хабар топганимиздан сўнг тезда маҳалла идорасига ўрнатилган сигнализация орқали Миллий гвардияга хабар бердик. Улар ҳам 15 дақиқада етиб келишди», — дейди «Чўлқувар» МФЙ раиси ўринбосари Мўтабар Азизова.
Журналистлар сўровига жавоб берган Миллий гвардиянинг вилоят бошқармаси қўриқлаш хизмати масъули, техника бўлими бош мутахассиси Баҳром Ёқубов эса маҳалладан Миллий гвардияга соат 09:42 да хабар борганини, Миллий гвардия ходимлари маҳалла идорасига соат 09:47 да етиб келган.
Миллий гвардия ходими Алишер Ҳакимовнинг “Дарё” мухбирига қўшимча маълумот беришича, улар чақирилган манзилга етиб борганда, воқеа МФЙ идорасидан сал нарида содир бўлгани, ўша ерга боришлари лозимлиги айтилган.
“Воқеа жойига борганимизда кимнингдир оёқ кийими, темир жисмларга кўзимиз тушди. Сўнгра, одамларни тинчлантириб, профилактика инспекторига қўнғироқ қилдик. У судда эканини айтиб, тезда келишини билдирди. Сўнгра тахминан беш-ўн дақиқадан сўнг, воқеа жойига етиб келди. Биз камераларни ҳам кўздан кечирдик”, — дейди Алишер Ҳакимов.
Масъулнинг айтишича, Миллий гвардия ходимлари одатда воқеа жойига чақирилгач, вазиятни тинчлантириб, сўнгра ортга қайтади.
Кузатув камераларига эътибор қаратиладиган бўлса, воқеа иштирокчилари чалажон Элбек Раҳимовни соат 09:45 да машинага мажбурлаб тиқиб, воқеа жойидан олиб кетган.
Воқеа ҳақида гапирган Ҳулкар Жалилова ҳам ИИБ ходимлари воқеа жойига жуда кеч келганини, дўппосланган йигит ваҳшийларча калтакланганини айтмоқда.
«Бунда ота-оналарнинг айби бор. Тушунмаяпман, бундай безори болаларга ким тарбия берган, нега бу даражада ваҳшийликка қўл уришди», — дейди Ҳулкар Жалилова.
«Дарё» мухбири билан суҳбатлашган вилоят ИИБ ахборот хизмати раҳбари Ирода Расулова ИИБ ходимларининг воқеа жойига жуда кеч — 40-45 дақиқада етиб келгани ҳақидаги фикрларга жавобан 102 қисқа рақамларига чиқиб, вазиятни тез орада ойдинлаштириб, ИИБ ходимларига қачон чақирув бўлгани ҳамда воқеа жойига қачон етиб борганини ойдинлаштириб беришини маълум қилди. Аммо орадан салкам уч соат ўтса-да, бундай ахборот бермади. Қайта-қайта қилинган телефон қўнғироқларига жавоб бермади.
Қашқадарё вилояти ИИБ ахборот хизматининг расмий Telegram-каналида воқеа юзасидан берилган қўшимча ахборотга кўра, марҳум Элбек Раҳимовнинг кўп қаватли уйидан чиқишини кутиб турган етти нафар шахс уни қарши олиб, совуқ қуроллар билан бош, юз, кўкрак ва танасининг бошқа соҳаларига уриб, оғир тан жароҳати етказган. Сўнгра Gentra автомашинасига мажбуран миндириб, жиноий қилмишларини яшириш мақсадида Чироқчи туман тиббиёт бирлашмасига олиб бориб ташлаган. Натижада Элбек Раҳимов кўрсатилган тиббий ёрдамга қарамасдан, шу куни шифохонада вафот этган.
«Жиноятни ‘иссиқ излар’да фош этиш мақсадида олиб борилган тезкор қидирув-суриштирув тадбирлари натижасида шу куннинг ўзида жиноятга алоқадор Қарши шаҳри ва Қарши туманида яшовчи фуқаролар — Ш.Т., Ж.А., О.Р., Я.Я., Ш.З. ва Э.А.лар ушланган. Ҳолат юзасидан Қарши шаҳар прокурори томонидан З.Б. ва бошқаларга нисбатан Жиноят кодексининг 97-моддаси 2-қисми «л», «п» бандлари (бир гуруҳ шахслар ёки уюшган гуруҳ аъзоси томонидан ёхуд ўша гуруҳ манфаатларини кўзлаган ҳолда безорилик оқибатида қасддан одам ўлдириш) билан жиноят иши қўзғатилиб, Ш.Т., Ж.А., О.Р., Я.Я., Ш.З. ва Э.А.лар гумон қилинувчи тариқасида жалб қилинди ҳамда ҳимоячи билан таъминланиб, Жиноят процессуал кодекснинг 221-моддаси тартибида ушланди», — дейилади вилоят ИИБ расмий каналидаги ахборотда.
Вилоят ИИБ, шунингдек, Қаршида айнан шу воқеа билан боғлиқлиги хабар берилган яна бир видеога муносабат билдириб, ҳолатга ойдинлик киритиш ҳамда жиноятни фош этиш мақсадида тезкор суриштирув ишлари олиб борилаётганини маълум қилган.
«Дарё» воқеалар ривожини кузатишда давом этади.
Изоҳ (0)