Навоий шаҳри ҳудудидан ўтувчи давлат аҳамиятга эга автомобиль йўлида Faton ва Labo русумли автомашиналар тўқнашуви оқибатида бир нафар ҳайдовчи вафот этди. Бу ҳақда «Дарё»га вилоят ИИБ ЙҲХБ матбуот гуруҳи раҳбари Фаррух Якубов маълум қилди.
Таъкидланишича, 2021 йилнинг 13 август куни тахминан соат 17:20 да Навоий шаҳар ҳудудидан ўтган 4/Р64Г давлат аҳамиятга эга автомобиль йўлининг 12-13 километрида автомашиналар тўқнашуви содир бўлган.
Кармана туманида яшовчи 49 ёшли ҳайдовчи Н.И. бошқарувида бўлган Labo русумли автомашинада Навоий—Қарнаб йўналиши бўйлаб ҳаракатланиб келиб, чарчоқдан чалғиши оқибатида руль бошқарувини йўқотган. Ҳамда қарама-қарши томондан ҳаракатланиб келаётган Faton русумли автомашинага урилган. Labo’нинг мудҳиш даражада шикастланиши натижасида ҳайдовчиси оғир тан жароҳати олиб, шифохонага ҳам етмай тез тиббий ёрдам автомашинасида вафот этган.
Ҳолат юзасидан Навоий шаҳар ИИБ ФМБ ҳузуридаги Тергов бўлими томонидан дастлабки тергов олди суриштирув ишлари олиб борилмоқда.
Изоҳ (0)