Ўзбекистондаги баъзи раҳбарларнинг бепарволиги ёки манфаатпарастлиги туфайли турар жой мавзеларида одамлар сайр қиладиган, спорт билан шуғулланадиган очиқ жойлар қолмаяпти. Бу ҳақда Президент Шавкат Мирзиёев «Янги Ўзбекистон» газетасининг 17 август кунги сонига берган интервьюсида таъкидлаб ўтган.
«Шуни алоҳида таъкидлаш керакки, биз илгари уй-жой қурилишига замон талабларидан келиб чиқиб, бундай кенг ёндашмаганмиз ва ҳозиргидек кенг кўламдаги қурилиш ишларини амалга оширмаганмиз.
Биз бу йўлда дастлабки қадамларни қўйиб, катта тажриба орттирмоқдамиз. Барча ҳудудларимизда аҳоли учун қулай ва шинам, барча замонавий шароитларга эга бўлган уй-жойлар барпо этилмоқда. Ипотека бозори ривожланмоқда. Ҳаётимизга ‘арзон уй-жойлар’, ‘ақлли уй’, ‘ақлли шаҳар’, ‘рақамли хизматлар’ деган янги тушунча ва кўникмалар кириб келмоқда.
Келгусида уй-жой фондини шундай даражага олиб чиқишимиз керакки, аҳолининг барча қатламлари уй-жой сотиб олиш ва бу борада танлаш имконига эга бўлиши лозим», — деган Президент.
Давлат раҳбари бу борада турли муаммолар ҳам мавжудлиги, улар жойлардаги маҳаллий бошқарув органлари билан биргаликда ҳал этилаётганини қайд этган.
«Мисол учун, кўп қаватли уйлар оралиғидаги бўш жойларда қурилишлар қилиш, мораторий эълон қилинганига қарамасдан, дарахтларни кесиш, яшил ҳудудларни камайтириш ҳолатлари кўпчиликни ранжитмоқда. Баъзи раҳбарларнинг бепарволиги ёки манфаатпарастлиги туфайли турар жой мавзеларида одамлар сайр қиладиган, спорт билан шуғулланадиган, фарзандлари билан бирга тоза ҳавода дам оладиган очиқ жойнинг ўзи қолмаяпти.
Албатта, биз бундай ҳолатларга нисбатан қатъий чоралар кўрмасдан туролмаймиз. Шунинг учун ҳам Тошкентда ва бошқа йирик шаҳарларда янги қурилишларни шаҳар ташқарисидаги ҳудудларда амалга ошириш чоралари белгиланмоқда. Турар жой мавзелари ичида коммунал инфратузилмалар – газ, электр энергияси, ичимлик суви ва канализация тармоқларини модернизация қилмасдан, янги бинолар қуриш амалиётига барҳам берилди», — деган Шавкат Мирзиёев.
Изоҳ (0)