Фарғона вилоятининг Фарғона туманида яшовчи Набижон Валиевлар оиласи меҳрибонлик уйида тарбияланаётган олти нафар етим болани ўз тарбиясига олди, дея хабар берди «Дарё» Азизжон Эрматов.
Қайд этилишича, вилоятда давлат раҳбарининг 2021 йил 9 августда қабул қилинган «Етим болалар ва ота-она қарамоғидан маҳрум бўлган болаларни тарбиялашнинг тубдан янгиланган тизимини жорий этиш чора-тадбирлари тўғрисида»ги қарори асосида хайрли ишлар бошлаб юборилган.
Фарғона тумани «Чекшўра» маҳалла фуқаролар йиғинида истиқомат қилувчи Набижон Валиевлар оиласи Марғилон шаҳридаги 1-сонли меҳрибонлик уйидан тегишли тартибда олти нафаргача болани тарбияга олиш бўйича мурожаат қилган. Миллий гвардиянинг вилоят бошқармаси мазкур масалани ўрганиб, оила шароити билан танишгач, барча талабларга жавоб бериши маълум бўлган.
Оила уч йилдан бери фарзанд асраб олиш учун тегишли идораларга мурожаат қилиб, натижа ололмаган. Миллий гвардиянинг Фарғона вилояти бошқармаси бошлиғи, полковник Шавкат Акбаров мазкур муаммони ўрганиб, ижобий ҳал қилган. Ҳужжатлар расмийлаштирилиб, Валиевлар оиласи Марғилон шаҳридаги 1-сонли меҳрибонлик уйидан 6 нафар чин етим болани фарзандликка олган.
Болалар оилага берилганидан кейин Миллий гвардия ва вилоят ҳокимлиги масъуллари уларни ўз ҳолига ташлаб қўйгани йўқ. Болалардан хабар олиниб, суҳбатлар ташкил этилмоқда. Шунингдек, уларнинг ўқишлари учун шароитлар яратиб беришга кўмаклашилмоқда.
Набижон Валиев кўп болали оилада вояга етган, у тадбиркор, турмуш ўртоғи Зиёдахон Валиева эса Фарғона шаҳридаги 4-умумтаълим мактабида маънавий-маърифий ишлар бўйича директор ўринбосари лавозимида ишлайди. Уларнинг 4 нафар фарзандлари энди 10 нафарга етди.
Изоҳ (0)