Япониянинг Токио шаҳрида ХХХИИ ёзги Олимпия ўйинлари бўлиб ўтди. Унда иштирок этган Ўзбекистон терма жамоаси умумий ҳисобда 5 та медал қўлга киритди ва умумжамоа ҳисобида 32-ўринни эгаллади. Ушбу кўрсаткич медаллар сифати бўйича Ўзбекистон тарихидаги энг яхши иккинчи натижа бўлди. Шундай экан, Ўзбекистон қатнашган барча Олимпиадалар ва уларда қўлга киритилган медаллар ҳақида фикр юритишнинг айни вақти.
Ўзбекистон делегацияси ўзи қатнашган еттита Олимпиадада жами 36 та медалга эга чиққан — 10 та олтин, 6 та кумуш ва 20 та бронза.
Энг кўп медални боксчилар келтирган — 15 та. Кураш вакиллари 8 та медалга (6 та эркин кураш, 2 та юнон-рум) эга чиққан бўлса, дзюдочилар Ўзбекистонга 7 та медал келтирган. Учта медал оғир атлетикачилар томонидан қўлга киритилган, икки медалга енгил атлетикачилар эга чиққан. Таэквондо бўйича эса битта медал қўлга киритилган.
Атлантадаги ёзги ўйинлар 1996 йилнинг 19 июль куни старт олган ва 4 августга қадар давом этган. Мусобақада Ўзбекистон делегацияси 12 та спорт тури бўйича жами 71 та йўлланма қўлга киритади. Дебют Олимпиадада ўзбекистонлик спортчилар иккита медалга эга чиққан ҳолда умумжамоа ҳисобида 197 давлат орасида 58-ўриндан жой олади.
Ушбу мусобақада -86 кг вазн тоифасида иштирок этган дзюдочи Армен Багдасаров Ўзбекистон сафида ёзги Олимпия ўйинлари тарихида илк медални (кумуш) қўлга киритган бўлса, боксчи Карим Тўлаганов -75 килограмм вазн тоифасида бронза медалига эга чиқади.
Сидней—2000 (1 та олтин, 1 та кумуш, 2 та бронза)Австралияда ўтган тўрт йилликнинг энг нуфузли мусобақаси 2000 йилнинг 15 сентябридан 1 октябригача бўлган муддатда бўлиб ўтади. Ўзбекистон номидан бу сафар 12 та спорт тури бўйича 70 нафар иштирокчи қатнашади. Делегация аъзолари мусобақада умумий ҳисобда 4 та медал қўлга киритади ва медаллар кесимида 199 та давлат ичида 43-поғонани банд этади. Боксчи Муҳаммадқодир Абдуллаев ярим ўрта вазн тоифасида олтин медални қўлга киритиб, Ўзбекистонга Олимпиадалардаги биринчи олтинни тақдим этади.
Эркин курашчи Артур Таймазов (-130 кг) финал беллашувида мағлубиятга учраб, кумуш медал билан чекланган бўлса, боксчилар Рустам Саидов (+91 кг) ва Сергей Михайлов (-81 кг) бронза медалини қўлга киритади.
Афина—2004 (2 та олтин, 1 та кумуш, 2 та бронза)
Грециянинг Афина шаҳрида 2004 йилнинг 13 августидан 29 августигача бўлиб ўтган мусобақа Ўзбекистон учун учинчи Олимпия ўйинлари бўлади. Унда Ўзбекистондан 70 нафар спортчи 13 та спорт тури бўйича баҳсларга киришади ва якунда умумжамоа ҳисобида 43-ўринни эгаллайди.
Сидней Олимпиадасида кумуш медалини қўлга киритган эркин курашчи Артур Таймазов (-120 кг) бу сафар олтин медални ўзиники қилади. Шунингдек, юнон-рум курашчиси Александр Доктуришвили (-74 кг) ҳам мусобақани шоҳсупанинг энг юқори поғонасида якунлайди.
Эркин курашчи Магомед Ибрагимов (-96 кг) ҳал қилувчи беллашувда имкониятни бой бериб қўяди ва кумуш медалини ўзиники қилади. Боксчилар Баҳодиржон Султонов (ўта енгил вазн) ва Ўткирбек Ҳайдаров (ярим оғир) эса бронза медали билан тақдирланади.
Пекин—2008 (1 та кумуш, 3 та бронза)
Хитой пойтахти мезбонлик қилган мусобақа 2008 йилнинг 8 августидан 24 августигача бўлган вақт оралиғида бўлиб ўтади. Унда Ўзбекистондан 58 нафар спортчи 13 та спорт тури бўйича баҳсларда қатнашиб, медаллар кесими бўйича якунда 204 та давлат орасида 62-ўринни эгаллайди.
Ўзбекистонлик спортчилар мусобақа якунида 6 та медал қўлга киритади, бироқ кейинчалик эркин курашчилар Артур Таймазов (олтин) ва Сослан Тигиевнинг (кумуш) медаллари антидопинг қоидалари сабаб улардан олиб қўйилади. Шу тариқа Ўзбекистон 4 та медал билан қолади.
Пекин Олимпиадасида совриндор бўлган спортчилар:
- Абдулла Тангриев (дзюдо, +100 кг) — кумуш медал;
- Антон Фокин (гимнастика, брус машқлари) — бронза;
- Ришод Собиров (дзюдо, -60 кг) — бронза;
- Екатерина Хилко (гимнастика, батутда сакраш) — бронза.
Ўзбекистон ўзининг кетма-кет бешинчи Олимпиадасида иштирокчилар борасида антирекорд ўрнатади. 2012 йилнинг 27 июлидан 12 августига қадар давом этган мусобақада Ўзбекистон номидан 13 спорт тури бўйича 58 нафар спортчи қатнашади ва умумжамоа ҳисобида 204 та давлат ичида 72-ўринни эгаллайди.
Артур Таймазов ва Сослан Тигиевнинг Лондондаги натижалари ҳам кейинчалик бекор қилинади. Таймазов бу сафар ҳам олтин медални қўлга киритган бўлса, Тигиев бронзага эга чиққанди.
Ришод Собиров (дзюдо, -60 кг) кетма-кет иккинчи марта бронза медалини қўлга киритади. Боксчи Аббос Атоев эса ярим ўрта вазн тоифасида бронза медалини ўзиники қилади. Яна бир бронза соҳиби оғир атлетикачи Иван Ефремов (-105 кг) аслида мусобақада бешинчи ўринни эгаллайди, аммо 2020 йилда у билан бирга рақобатлашган спортчиларнинг дисквалификация қилингани сабабли Иванга бронза медали берилади.
Рио—2016 (4 та олтин, 2 та кумуш, 7 та бронза)
Ўзбекистоннинг Олимпиадалардаги энг яхши натижаси қайд этилган Риодаги мусобақада атлетлар умумий ҳисобда 13 та медал қўлга киритган. 2016 йилнинг 5 августидан 21 августига қадар давом этган Олимпиадада Ўзбекистон номидан 70 нафар спортчи 15 та спорт тури бўйича баҳсларга киришади. Қўлга киритилган 13 та медал эса Ўзбекистонга умумжамоа ҳисобида 207 давлат орасида 21-ўринни эгаллашга имкон беради. Шунингдек, ушбу йилги мусобақа энг кўп олтин медал қўлга киритилгани билан ҳам спорт ихлосмандларининг ёдида қолган.
Рио Олимпиадасида олтин медал қўлга киритган ўзбекистонлик спортчилар:
- Руслан Нуриддинов — оғир атлетика, -105 кг (шунингдек, у силтаб кўтаришда 237 кг оғирликни бўйсундириб, Олимпия рекордини ўрнатган);
- Ҳасанбой Дўстматов — бокс, -49 кг;
- Шаҳобиддин Зоиров — бокс, -52 кг;
- Фазлиддин Ғойибназаров — бокс, -64 кг.
- Диёрбек Ўрузбоев — дзюдо, -60 кг;
- Ришод Собиров — дзюдо, -66 кг;
- Муроджон Аҳмадалиев — бокс, -56 кг;
- Рустам Тўлаганов — бокс, -91 кг;
- Элмурат Тасмуродов — юнон-рум кураши, -59 кг;
- Ихтиёр Наврўзов — эркин кураш, -65 кг;
- Магомед Ибрагимов — эркин кураш, -97 кг.
Токио—2020 (3 та олтин, 2 та бронза)
Япония пойтахти мезбонлик қилган мусобақа аслида 2020 йилда ўтказилиши керак эди. Бироқ коронавирус пандемияси сабаб бир йилга қолдирилади. 2021 йилнинг 23 июлидан 8 августигача бўлган муддатда ўтган ўйинларда Ўзбекистондан 17 хил спорт тури бўйича 67 нафар атлет 65 та йўлланма қўлга киритади.
Мусобақада 5 та медал қўлга киритган делегация умумжамоа ҳисобида 32-ўринни эгаллади. Баҳодир Жалолов (бокс), Улуғбек Рашидов (таэквондо), Акбар Жўраев (оғир атлетика) олтин, Давлат Бобонов (дзюдо) ва Бекзод Абдураҳмонов (эркин кураш) эса бронза медалини қўлга киритади.
Токио Олимпиадасида олтин медал қўлга киритган ўзбекистонлик спортчилар:
- Улуғбек Рашидов — таэквондо, -68 кг;
- Акбар Жўраев — оғир атлетика, -109 кг;
- Баҳодир Жалолов — бокс, +91 кг.
- Давлат Бобонов — дзюдо, -90 кг;
- Бекзод Абдураҳмонов — эркин кураш, -74 кг.
Изоҳ (0)