Yaponiyaning Tokio shahrida XXXII yozgi Olimpiya o‘yinlari bo‘lib o‘tdi. Unda ishtirok etgan O‘zbekiston terma jamoasi umumiy hisobda 5 ta medal qo‘lga kiritdi va umumjamoa hisobida 32-o‘rinni egalladi. Ushbu ko‘rsatkich medallar sifati bo‘yicha O‘zbekiston tarixidagi eng yaxshi ikkinchi natija bo‘ldi. Shunday ekan, O‘zbekiston qatnashgan barcha Olimpiadalar va ularda qo‘lga kiritilgan medallar haqida fikr yuritishning ayni vaqti.
O‘zbekiston delegatsiyasi o‘zi qatnashgan yettita Olimpiadada jami 36 ta medalga ega chiqqan — 10 ta oltin, 6 ta kumush va 20 ta bronza.
Eng ko‘p medalni bokschilar keltirgan — 15 ta. Kurash vakillari 8 ta medalga (6 ta erkin kurash, 2 ta yunon-rum) ega chiqqan bo‘lsa, dzyudochilar O‘zbekistonga 7 ta medal keltirgan. Uchta medal og‘ir atletikachilar tomonidan qo‘lga kiritilgan, ikki medalga yengil atletikachilar ega chiqqan. Taekvondo bo‘yicha esa bitta medal qo‘lga kiritilgan.
Atlantadagi yozgi o‘yinlar 1996-yilning 19-iyul kuni start olgan va 4-avgustga qadar davom etgan. Musobaqada O‘zbekiston delegatsiyasi 12 ta sport turi bo‘yicha jami 71 ta yo‘llanma qo‘lga kiritadi. Debyut Olimpiadada o‘zbekistonlik sportchilar ikkita medalga ega chiqqan holda umumjamoa hisobida 197 davlat orasida 58-o‘rindan joy oladi.
Ushbu musobaqada -86 kg vazn toifasida ishtirok etgan dzyudochi Armen Bagdasarov O‘zbekiston safida yozgi Olimpiya o‘yinlari tarixida ilk medalni (kumush) qo‘lga kiritgan bo‘lsa, bokschi Karim To‘laganov -75 kilogramm vazn toifasida bronza medaliga ega chiqadi.
Sidney—2000 (1 ta oltin, 1 ta kumush, 2 ta bronza)Avstraliyada o‘tgan to‘rt yillikning eng nufuzli musobaqasi 2000-yilning 15-sentabridan 1-oktabrigacha bo‘lgan muddatda bo‘lib o‘tadi. O‘zbekiston nomidan bu safar 12 ta sport turi bo‘yicha 70 nafar ishtirokchi qatnashadi. Delegatsiya a’zolari musobaqada umumiy hisobda 4 ta medal qo‘lga kiritadi va medallar kesimida 199 ta davlat ichida 43-pog‘onani band etadi. Bokschi Muhammadqodir Abdullayev yarim o‘rta vazn toifasida oltin medalni qo‘lga kiritib, O‘zbekistonga Olimpiadalardagi birinchi oltinni taqdim etadi.
Erkin kurashchi Artur Taymazov (-130 kg) final bellashuvida mag‘lubiyatga uchrab, kumush medal bilan cheklangan bo‘lsa, bokschilar Rustam Saidov (+91 kg) va Sergey Mixaylov (-81 kg) bronza medalini qo‘lga kiritadi.
Afina—2004 (2 ta oltin, 1 ta kumush, 2 ta bronza)
Gretsiyaning Afina shahrida 2004-yilning 13-avgustidan 29-avgustigacha bo‘lib o‘tgan musobaqa O‘zbekiston uchun uchinchi Olimpiya o‘yinlari bo‘ladi. Unda O‘zbekistondan 70 nafar sportchi 13 ta sport turi bo‘yicha bahslarga kirishadi va yakunda umumjamoa hisobida 43-o‘rinni egallaydi.
Sidney Olimpiadasida kumush medalini qo‘lga kiritgan erkin kurashchi Artur Taymazov (-120 kg) bu safar oltin medalni o‘ziniki qiladi. Shuningdek, yunon-rum kurashchisi Aleksandr Dokturishvili (-74 kg) ham musobaqani shohsupaning eng yuqori pog‘onasida yakunlaydi.
Erkin kurashchi Magomed Ibragimov (-96 kg) hal qiluvchi bellashuvda imkoniyatni boy berib qo‘yadi va kumush medalini o‘ziniki qiladi. Bokschilar Bahodirjon Sultonov (o‘ta yengil vazn) va O‘tkirbek Haydarov (yarim og‘ir) esa bronza medali bilan taqdirlanadi.
Pekin—2008 (1 ta kumush, 3 ta bronza)
Xitoy poytaxti mezbonlik qilgan musobaqa 2008-yilning 8-avgustidan 24-avgustigacha bo‘lgan vaqt oralig‘ida bo‘lib o‘tadi. Unda O‘zbekistondan 58 nafar sportchi 13 ta sport turi bo‘yicha bahslarda qatnashib, medallar kesimi bo‘yicha yakunda 204 ta davlat orasida 62-o‘rinni egallaydi.
O‘zbekistonlik sportchilar musobaqa yakunida 6 ta medal qo‘lga kiritadi, biroq keyinchalik erkin kurashchilar Artur Taymazov (oltin) va Soslan Tigiyevning (kumush) medallari antidoping qoidalari sabab ulardan olib qo‘yiladi. Shu tariqa O‘zbekiston 4 ta medal bilan qoladi.
Pekin Olimpiadasida sovrindor bo‘lgan sportchilar:
- Abdulla Tangriyev (dzyudo, +100 kg) — kumush medal;
- Anton Fokin (gimnastika, brus mashqlari) — bronza;
- Rishod Sobirov (dzyudo, -60 kg) — bronza;
- Yekaterina Xilko (gimnastika, batutda sakrash) — bronza.
O‘zbekiston o‘zining ketma-ket beshinchi Olimpiadasida ishtirokchilar borasida antirekord o‘rnatadi. 2012-yilning 27-iyulidan 12-avgustiga qadar davom etgan musobaqada O‘zbekiston nomidan 13 sport turi bo‘yicha 58 nafar sportchi qatnashadi va umumjamoa hisobida 204 ta davlat ichida 72-o‘rinni egallaydi.
Artur Taymazov va Soslan Tigiyevning Londondagi natijalari ham keyinchalik bekor qilinadi. Taymazov bu safar ham oltin medalni qo‘lga kiritgan bo‘lsa, Tigiyev bronzaga ega chiqqandi.
Rishod Sobirov (dzyudo, -60 kg) ketma-ket ikkinchi marta bronza medalini qo‘lga kiritadi. Bokschi Abbos Atoyev esa yarim o‘rta vazn toifasida bronza medalini o‘ziniki qiladi. Yana bir bronza sohibi og‘ir atletikachi Ivan Yefremov (-105 kg) aslida musobaqada beshinchi o‘rinni egallaydi, ammo 2020-yilda u bilan birga raqobatlashgan sportchilarning diskvalifikatsiya qilingani sababli Ivanga bronza medali beriladi.
Rio—2016 (4 ta oltin, 2 ta kumush, 7 ta bronza)
O‘zbekistonning Olimpiadalardagi eng yaxshi natijasi qayd etilgan Riodagi musobaqada atletlar umumiy hisobda 13 ta medal qo‘lga kiritgan. 2016-yilning 5-avgustidan 21-avgustiga qadar davom etgan Olimpiadada O‘zbekiston nomidan 70 nafar sportchi 15 ta sport turi bo‘yicha bahslarga kirishadi. Qo‘lga kiritilgan 13 ta medal esa O‘zbekistonga umumjamoa hisobida 207 davlat orasida 21-o‘rinni egallashga imkon beradi. Shuningdek, ushbu yilgi musobaqa eng ko‘p oltin medal qo‘lga kiritilgani bilan ham sport ixlosmandlarining yodida qolgan.
Rio Olimpiadasida oltin medal qo‘lga kiritgan o‘zbekistonlik sportchilar:
- Ruslan Nuriddinov — og‘ir atletika, -105 kg (shuningdek, u siltab ko‘tarishda 237 kg og‘irlikni bo‘ysundirib, Olimpiya rekordini o‘rnatgan);
- Hasanboy Do‘stmatov — boks, -49 kg;
- Shahobiddin Zoirov — boks, -52 kg;
- Fazliddin G‘oyibnazarov — boks, -64 kg.
- Diyorbek O‘ruzboyev — dzyudo, -60 kg;
- Rishod Sobirov — dzyudo, -66 kg;
- Murodjon Ahmadaliyev — boks, -56 kg;
- Rustam To‘laganov — boks, -91 kg;
- Elmurat Tasmurodov — yunon-rum kurashi, -59 kg;
- Ixtiyor Navro‘zov — erkin kurash, -65 kg;
- Magomed Ibragimov — erkin kurash, -97 kg.
Tokio—2020 (3 ta oltin, 2 ta bronza)
Yaponiya poytaxti mezbonlik qilgan musobaqa aslida 2020-yilda o‘tkazilishi kerak edi. Biroq koronavirus pandemiyasi sabab bir yilga qoldiriladi. 2021-yilning 23-iyulidan 8-avgustigacha bo‘lgan muddatda o‘tgan o‘yinlarda O‘zbekistondan 17 xil sport turi bo‘yicha 67 nafar atlet 65 ta yo‘llanma qo‘lga kiritadi.
Musobaqada 5 ta medal qo‘lga kiritgan delegatsiya umumjamoa hisobida 32-o‘rinni egalladi. Bahodir Jalolov (boks), Ulug‘bek Rashidov (taekvondo), Akbar Jo‘rayev (og‘ir atletika) oltin, Davlat Bobonov (dzyudo) va Bekzod Abdurahmonov (erkin kurash) esa bronza medalini qo‘lga kiritadi.
Tokio Olimpiadasida oltin medal qo‘lga kiritgan o‘zbekistonlik sportchilar:
- Ulug‘bek Rashidov — taekvondo, -68 kg;
- Akbar Jo‘rayev — og‘ir atletika, -109 kg;
- Bahodir Jalolov — boks, +91 kg.
- Davlat Bobonov — dzyudo, -90 kg;
- Bekzod Abdurahmonov — erkin kurash, -74 kg.
Izoh (0)