Ўзбекистонда мажбурий эмлашни назарда тутувчи қонун имзоланганди. Қонун билан Меҳнат кодексининг 113-моддасига ходим карантинли ва юқумли касалликлар таҳдиди бўлганда давлат бош санитария врачи қарори асосида профилактик эмлашдан ўтишни рад этса (қарши кўрсатма мавжуд бўлмаганда), иш берувчи уни ишга қўймасликка ҳақли эканига оид қўшимча киритилди. «Адолат» партияси Сиёсий кенгаши раиси, Ўзбекистон президентлигига номзод Баҳром Абдуҳалимов мазкур қонун фақат иш берувчига фойдали экани, ходимлар манфаати кўзланмаганини айтди.
«Албатта, ушбу меъёрлар халқ саломатлигини кўзлаб жорий этилган. Вирусга чалиниш занжирини узиш учун профилактик тадбирлар шарт. Аммо ушбу қонун, асосан, иш берувчилар фойдасига хизмат қилмоқда. Ходим манфаатларидан эса четлаб ўтилмоқда.
‘Соғлиғининг ҳолатига кўра қарши кўрсатма мавжуд бўлмаганда’ изоҳи берилгани айни муддао, бироқ шифокор рухсатидан сўнг вакцина қабул қилган ходимларга ҳам имтиёз ва имкониятлар берилганида нур устига нур бўлар эди», — дейди Баҳром Абдуҳалимов.
Унинг сўзларига кўра, вакцина олгач, айрим безовталиклар (иситма, ҳолсизлик, оғриқ) кузатилиши реал мисоллар билан исботини топди. Аслида бу хавотирли ҳолат эмас, аксинча иммунитет шаклланаётганидан дарак беради. Мазкур аломатлар юз бераётган вақтда (тахминан, 3 кун давомида) ходимга иш ҳақи сақланадиган таътил бериш мақсадга мувофиқ.
«Бинобарин, соғлом вужудгина тўлақонли меҳнат қилишга қодир бўлади. Вакцина реакцияси вақтинча ноқулайликлар туғдираётганида ходимнинг иш унумдорлиги пасайиши табиий. Шундай экан, вакцина олган ходимга ўз соғлиғига эътиборли бўлиши учун шароит яратиб берган афзалдир», — дейди «Адолат» партияси раҳбари.
У 2020 йилда Ўзбекистонда қатъий карантин талаблари ҳукм сурганида имкони бор ташкилотлар ўз ходимларини масофавий меҳнатга ўтказганда, компьютер орқали бажариладиган ишларда уйдан туриб меҳнат қилиш иш сифатига таъсир қилмаганини таъкидлаб, бу амалиётга вакцина олган фуқаро манфаати юзасидан ҳозир ҳам қисман мурожаат қилиш мумкинлигини билдирди.
«Ишга узоқ масофадан қатнайдиган ишчилар бор. Уларни вакцинадан кейин кўчада йўл кечиб юришга мажбурламай, масофавий меҳнатга вақтинча ўтказиб туриш керакмасмикан? Албатта, аломатлар оғирроқ кечса, ишга келишдан ҳам, уйда ишлашдан ҳам озод қилиш ва иш ҳақини сақлаш инсонийликдан бўлади. Чунки у ўзига келгунича ётоқ тартибида бўлиши, шифокор тавсия этган муолажаларни олиб бориши лозим.
Коронавирус ҳаммада ҳар хил кечаётганини кўриб, гувоҳи бўляпмиз. Кимдадир оғир, кимдадир енгил, бошқа бировда аломатларсиз ўтяпти. Бундан қатъи назар вирус аниқланган бемор ўзини соғломлардан изоляция қилиши шарт. Оғир аҳволдаги беморлар шифохонада, ўртамиёналар уйида изчил муолажалар билан даволаняпти ва ишидан касаллик таътилига чиқяпти. Лекин енгил ва аломатсиз ўтказаётган беморлар, асосан, бошқаларни кўзлаб — ташувчи бўлиб қолмаслик учун уйда қолади. Балки, бу вақт оралиғида касаллик таътили эмас, масофавий меҳнатдан фойдаланган маъқулдир. Эҳтимол шу йўл билан ходимга иш ҳақини тўлиқ бериш орқали кўмак кўрсатилар.
Хуллас, бу мавзуни яхшилаб ўйлаб кўриш керак. Афсуски, мазкур масалага парламент томонидан жиддий ёндашилмаган. Ваҳоланки, қонунлар бир томонлама эмас, мукаммал яратилиши лозим. Иш берувчига фақат ҳуқуқ берилган, лекин унга мажбуриятлар ҳам юклатиш зарур. Депутатлар ва сенаторлар нега ушбу омилларни назардан четда қолдиришган, деган таассуфдамиз», — деган Баҳром Абдуҳалимов.
Эслатиб ўтамиз, Олий Мажлис Қонунчилик палатаси спикери ўринбосари, президентликка номзод Алишер Қодиров ҳукумат эмланмаганларнинг эркини чеклаши кераклигини таъкидлаганди. Омбудсман Феруза Эшматова Ўзбекистонда мажбурий эмлашни жорий этиш орқали инсон ҳуқуқларига путур етказилмаяптими, деган саволга жавоб берганди.
Изоҳ (0)