Қашқадарё вилоятининг Косон тумани ҳокимлиги атрофида ўрнатилган темир тўсиқлар 15 август куни олиб ташланди, деб хабар бермоқда туман ҳокимлиги матбуот хизмати.
«Косон тумани ҳокимлиги фуқаролар билан ишлашда очиқлик ва ошкораликка доим амал қилиб келади. Бунга яқинда туман ҳокими кабинети Халқ қабулхонасига айлантирилгани яққол мисол бўлади. Қолаверса, ҳокимлик халқ билан ўртадаги ҳар қандай тўсиқни олиб ташлаш тарафдори. Шу боис, бугун ҳокимият атрофидаги панжаралар бузиб олинди», — дейилган ҳокимлик хабарида ва эндиликда бино атрофида бундай панжалар ўрнатилмаслиги билдирилган.
Эслатиб ўтамиз, куни кеча Қашқадарё вилояти ҳокими Зоир Мирзаев ҳали ҳам Қашқадарёнинг айрим ҳокимликлари панжара билан ўралганини танқид қилганди.
«Кичкинагина вилоят ташкилотлари панжара, панжарадан сўнг яна нималардир қўйиб, одамларнинг йўлини тўсиб қўйган. Ўзи қўриқланадиган ҳеч нарса йўқ, лекин панжара билан тўсилган. Мен шундай пайтда ташкилот раҳбарларидан панжара билан кимдан нимани қўриқлаётганини сўрайман. Хўш, ташкилотини халқдан қўриқлаяптими?», — деган эди вилоят раҳбари.
«Нимага ҳокимлик ёпиқ жой бўлиши керак? Мен вилоят ҳокимлигига чақирилган ҳокимларни ҳар сафар ҳокимлик олдидан олиб киришни буюраман, нимага? Ҳокимлар шу томондан кирса, панжара йўқлигини кўради. Мен ҳокимлик биносига кираётган йўлда панжара йўқ. Буни ақли етган тушунади. Одамлар онгида ҳокимлик ҳалигача ёпиқ ташкилот деган тушунча қолмаслиги керак», — деб таъкидлаган Зоир Мирзаев.
Қайд этиш лозим, Ғузор тумани ҳокими Бекзод Суюнов 2021 йилнинг 6 февраль куни шундай ташаббус билан чиқиб, Ғузор ҳокимлигини ўраб турган панжараларни олиб ташлаганди.
Аниқланишича, айни кунда вилоятнинг Чироқчи, Деҳқонобод, Яккабоғ, Шаҳрисабз, Китоб, Косон тумани ҳокимликлари панжара билан ўраб қўйилган.
Изоҳ (0)