Афғонистон пойтахти Кобулдан Тошкентга биринчи авиарейс учиб келди, деб хабар беради Telegram’даги AviaSpotter канали.
Таъкидланишича, рейс Kam Air авиакомпаниясининг Airbus А343 самолёти орқали амалга оширилган.
«Эътиборли жиҳати бу авиакомпаниянинг Афғонистонда ҳарбий ва сиёсий беқарорлик бошланганидан кейин Тошкентга учиб келган энг катта борти ҳисобланади. Бундан ташқари, Кобулдаги дипломатик миссия ходимларини эвакуация қилиш мақсадида Тошкентга амалга ошириладиган рейслар оширилган», — дейилади хабарда.
Аввалроқ «Толибон» Афғонистондаги учинчи катта шаҳар бўлган Ҳиротни ҳам эгаллагани тўғрисида хабар берилганди. Бундан ташқари, «Толибон» мамлакат шимолидаги Туркманистон билан чегарадош Бадғис вилоятини, унинг маъмурий маркази — Афғонистондаги бешинчи энг катта шаҳар Қалайи-Науни ҳам назорати остига олган.
Шунингдек, 12 августда «Толибон» Ғазни шаҳрини ва шу номдаги вилоятни ишғол қилган. Шаҳар мамлакат пойтахти Кобулдан 130 километр жануби-ғарбда жойлашган. Талинкот вилояти ва унинг маъмурий маркази ҳам деярли курашсиз эгалланган.
Эндиликда «Толибон» Афғонистондаги жами 12 та вилоят марказини назорат қилмоқда. Al Jazeera телеканалининг ҳукуматдаги манбаларга таяниб хабар беришича, Афғонистон ҳукумати зўравонликни тугатиш эвазига «Толибон»га мамлакатни бошқаришда иштирок этишни таклиф қилган. «Толибон» бу таклифга жавоб берганми ёки йўқ, ҳозирча номаълум. Аммо аввалроқ «Толибон» етакчилари Ашраф Ғани президентликдан кетмас экан, Афғонистон ҳукумати билан музокара қилмаслигини айтган.
Изоҳ (0)