14 август куни Калифорнияда ўтказиладиган аукционда 64 нусхада ишлаб чиқарилган Lexus LFA Nürburgring Package купелеридан бири сотувга қўйилади. Ушбу модель «24 соат Нюрбургринг»даги LFA пойгалари шарафига яратилган ва яхшиланган аэродинамикаси ҳамда кучли двигатели билан ажралиб туради. Ҳозирга қадар 1,5 минг километр йўл босган қора спорткар миллион долларга баҳоланмоқда, деб хабар беради Motor.
Lexus LFA Nürburgring Package модели илк бор 2010 йилда тақдим этилган. Нюрбургринг пойга трассаси шарафига яратилган спорткар углерод толадан ишланган кўп сонли экстерьер элементлари билан ажралиб турган. Муҳандислар олд сплиттер, орқа антиқанот, шунингдек, олд бампернинг «қанотлари»ни карбондан ишлаган. Спорткарга магнийли BBS ғилдираклари кийгизилган, янги газ чиқариш тизими ўрнатилган, бундан ташқари, унинг пойга «подвеска»си умумий оғирлик марказининг камайишига ва автомобиль бошқарувчанлигини яхшилашга хизмат қилади.
Япон мутахассислар бу каби эксклюзив спорткардан 64 нусха яратган бўлиб, уларнинг 25 таси АҚШ ҳудудида олиб келинган. Лотнинг ноёблиги шундаки, унинг интерьери қора рангли алкантара ва карбон элементларидан ишланган. Мутлақ қора Lexus LFA Nürburgring Package’ни уч нафар америкалик харид қилишга муваффақ бўлган. Автомобилларнинг аксарияти ёриқ сариқ ёки оқ рангга бўялган.
Спорткар 571 от кучи ва 480 Нм айланувчи моментни тақдим этишга қодир 4,8 литрли V10 двигатели ёрдамида ҳаракатга келади. Агрегат олти поғонали Аisin «робот» узатмалар қутиси ёрдамида бошқарилади. Соатига 100 километр тезликка спорткар 3,6 сонияда эришади, максимал тезлиги — 325 километр/соат.
Айни вақтда серияли Lexus LFA Nürburgring Package’нинг нархи 445 минг долларни ташкил этади. Савдолар давомида эксклюзив спорткарни миллион долларга сотиш режалаштирилган.
Мавзуга доир:
Изоҳ (0)