Ижтимоий тармоқларда «Зўравон мактаб директори фарзандларига қўшнисини дўппослатди» сарлавҳаси остидаги видеомурожаат тарқалди. Ҳолат юзасидан Жарқўрғон тумани ички ишлар бўлими масъул ходимлари томонидан ўрганиш ишлари олиб борилди.
Қайд этилишича, Жарқўрғон туманида 2021 йил 28 июль куни, тахминан, соат 11:30 ларда «Қумқишлоқ» маҳалласида яшовчи фуқаро Б.С., битта маҳаллада истиқомат қилувчи қариндошлари Т.Б. ва Қ.С. ўзаро тортишиб қолиб, жанжал вақтида бир-бирларини уриб, енгил тан жароҳати етказган.
Ҳолат юзасидан терговга қадар текширув ҳаракатларини олиб бориш жараёнида фуқаролар Б.С. ва Т.Б.га нисбатан судга оид тиббий экспертизалар тайинланган.
Маълум қилинишича, фуқаролар Т.Б. ва Қ.С. маҳалла ҳудудида жойлашган гузарда ичимлик сувини олиш вақтида қариндоши Б.С. келиб, телефонида уларни камерага олган, бу ҳолатни кўрган Т.Б. «нимага камерага оляпсан?» дея турли хил сўзлар билан уни ҳақорат қилиб, жанжаллашиб кетган.
26-мактаб директори Қ.Т.нинг бу жанжалга умуман алоқаси ҳамда бўлиб ўтган жанжалдан хабари йўқлиги, унинг ўғли Т.Б. жанжал қилгани аниқланган.
Ҳозирги кунда Т.Б., Б.С. ва Қ.С. бир-бирлари билан ўзаро ярашиб олган. Улар бир-бирларига даъвоси йўқлиги тўғрисида туман ИИБ бошлиғи номига ариза билан мурожаат қилгани маълум бўлган.
Мазкур ҳолат юзасидан Жарқўрғон тумани ИИБ томонидан терговга қадар текширув ҳаракатлари олиб борилиб, келгусида қонуний қарор қабул қилиниши таъминланиши маълум қилинган.
Бундан аввал Қашқадарёда мактаб директори ўринбосарининг ўғлига икки баҳо қўйган инглиз тили ўқитувчиси калтаклангани, Андижонда қимордаги қарзи сабаб қўшнисини ўлдириб, ҳожатхона яқинига кўмиб қўйган йигит 14,5 йилга қамалгани ҳамда Зангиотадаги COVID-марказда Миллий гвардия ходими ва фуқаро ўртасида жанжал содир бўлгани ҳақида хабар берилганди.
Изоҳ (0)