Audi 25 сантиметргача узаядиган родстер концептини тақдим этди (фото)

Audi компанияси учта шоу-кар — Skysphere, Grandsphere ва Urbansphere линейкасини тақдим этди. Уларнинг биринчига оид маълумотларга ҳозирда тарқалиб улгурди: 13 август куни Калифорниядаги Monterey Car Week фестивалида расмий тақдимоти ўтказиладиган Skysphere электрородстерининг расмий суратлари эълон қилинди. Янги родстер ҳаракатланиш режимидан келиб чиқиб, узунлигини ўзгартира олади. Қўшиладиган узунлик 25 сантиметрни ташкил этади ва бунинг барчаси ғилдираклар базаси ҳисобига тўғри келади, деб хабар беради Motor.

Узаядиган Skysphere ҳозирча концепт бўлиб, Audi’нинг дизайни ривожланаётганини намойиш этишга қаратилган: марканинг келажакда пайдо бўладиган электрокарлари айнан шу каби кўринишда бўлиши керак.

Skysphere ўтган асрнинг 30 йилларидаги беш метрли Horch 853 родстери каби яратилган ва замонавий технологиялар билан уйғунлашган арт-деко услубини сақлаб қолган. Концептнинг радиатор панжараси жойида ёруғлик нақшли ялтироқ панел мавжуд — қуйруқ қисмида эса қизил ёруғлик диодлар. Бошқа дизайнерлик жиҳатлари орасидан кенг ғилдирак аркалари, 23 дюймли аэродинамик дискалари ва йиғиладиган том қисми ўрин олган.

Родстер узунлиги ўзгарувчан. Skysphere 25 сантиметргача узайишга қодир ва буларнинг барчаси ғилдираклар базаси ҳисобига тўғри келади. Sports режимида машина узунлиги 4,94 метрни, тинч ҳаракатланишга мўлжалланган Grand Touring режимида эса 5,19 метрни ташкил этади. Умуман олганда жисмоний трансформация ғояси янги эмас: Renault Morphoz ҳам худди шу каби ишни қила оларди.

Таъкидлаш керакки, Skysphere жиҳозланган автопилот бошқарув жараёнида ҳайдовчининг аралашмаслигини таъминлайди. Бундан ташқари, тизим фаоллаштирилганида рул автоматик равишда олд панелга, тепкилар эса пол тирқишига йиғилади. Ҳайдовчи ва олд ўриндиқдаги йўловчининг зерикмаслигини кенг форматли дисплейга эга мултимедиа тизими таъминлайди.

Родстер 623 от кучини тақдим этишга қодир электромотор ёрдамида ҳаракатга келади. У эса ўз навбатида 80 киловатт-соат сиғимли батареядан қувватланади. Бир марта қувватланиш орқали машина 500 километр йўл босишга қодир. Оғирлиги 1,8 тоннага етадиган Skysphere соатига 100 километр тезликка тўрт сонияда эришади.

Қолган концептлар 2021 йилнинг сентябрида Мюнхенда ўтказиладиган автосалонда тақдим этилиши керак.