Тошкент шаҳрида пиёдалар йўлагидан ўтиш вақтида телефонда гаплашган фуқарога чора кўрмаган ЙҲХББ ходимларига интизомий жазо белгиланди, деб хабар беради ИИВ ЙҲХББ ахборот хизмати.
Ижтимоий тармоқларда 2021 йил 18 июль куни ижтимоий тармоқда «Нимага ГАИга пул узатдим?» сарлавҳаси остидаги видео тарқалди. Унда Бобур Ғаниев исмли блогер тажриба тариқасида пиёдалар ўтиш йўлагидан телефонда гаплашган ҳолда ҳаракатланган. Бироқ ушбу ҳудудда хизмат олиб бораётган ЙПХ ходими қоидабузар пиёдага нисбатан ҳеч қандай чора кўрмаган.
Шундан сўнг блогер ЙПХ ходимининг олдига бориб, ўзига нисбатан маъмурий баённома тузишини талаб қилган. Инспекторлардан бири ЙТҲ содир этилганини айтиб, баённома тузмасдан хизмат машинасида кетиб қолган. Бошқа бир инспектор эса блогерга чора кўрмай, огоҳлантириш беришини айтган. Блогер эса ўзига нисбатан чора кўришларини талаб қилган. Кейин эса жаримани қоидабузарлик содир этилган жойнинг ўзида тўлаш учун нақд пул бермоқчи бўлган, аммо ЙПХ ходимида «квитанцияси йўқлиги» сабаб тўловни жойида қабул қила олмаслигини таъкидлаган.
Маълум қилинишича, видеодаги ҳолат бўйича ИИВ ЙҲХББ масъул ходими томонидан хизмат текшируви ўтказилган. Текширув якунига кўра, хизмати давомида Вазирлар Маҳкамасининг 2018 йил 1 декабрдаги 975-сон қарори билан тасдиқланган «Йўл-патруль хизмати ходимларининг йўл ҳаракати қатнашчилари билан ўзаро муносабатлари ҳамда махсус мосламалардан фойдаланиши тартиби тўғрисида»ги низом ҳамда Ички ишлар вазирининг айрим меъёрий буйруқлари талабларига амал қилмагани учун Тошкент шаҳар ИИББ ЙҲХБнинг бир неча ходимларига нисбатан интизомий жазо чораси қўлланилиши белгиланган.
Аввалроқ Жиззахда ниқобни тўлиқ тақишга мажбур бўлмаган ЙПХ ходимига нисбатан хизмат текшируви тайинлангани, Олмалиқда ЙПХ ходими «25 марта радарга тўлаган» қоидабузар аёлни «Абдураззоқ ака»дан бўлган қўнғироқ сабаб қўйиб юборгани, Тошкентда ҳайдовчини тегишли белги қўйилмаган йўлда қоида бузганликда айблаган ЙПХ ходимига хизмат текшируви тайинлангани тўғрисида хабар берилганди.
Изоҳ (0)