Тошкент аэропортида 29, 26 ва 22 ёшли аёлларни Туркияга фоҳишаликка юбораётган аёл ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Департаментнинг Тошлоқ туман бўлими томонидан вилоят ДХХ ҳамда ИИБ ходимлари билан ҳамкорликда ўтказилган тезкор тадбирда фуқаро Д.Х. уч нафар аёлга ўз ҳисобидан авиачипта олиб бериб, уларни Туркиянинг Анталия шаҳрида фоҳишалик қилишга ёллаб, Тошкент халқаро аэропортида Тошкент—Анталия йўналиши орқали жўнатаётганида ушланган.
Қайд этилишича, мазкур ҳолат юзасидан Жиноят кодексининг 135-моддаси (одам савдоси) билан жиноят иши қўзғатилиб, тергов ҳаракатлари ўтказилмоқда.
Бундан аввал Фарғонада бир аёлни алдаб, уни Туркияга фоҳишалик қилишга юбормоқчи бўлган икки аёл қўлга олинганди. Шунингдек, Хоразмда уч нафар қизни Дубайга фоҳишалик қилиш учун жўнатишга уринган шахслар, Самарқандда 37 ёшли аёлни 1000 доллар эвазига Туркияга фоҳишалик учун сотган эркак ушланганди.
Изоҳ (0)