9 август куни Global Jewish Assistance and Relief Network (АҚШ) жамғармаси томонидан беғараз ёрдам сифатида тақдим этилган тиббий ниқобларининг биринчи қисми Ўзбекистонга келтирилди, деб хабар беради «Дунё» агентлиги.
Ҳозирда умумий қиймати 330 минг доллардан зиёд бўлган қарийб 270 минг дона тиббий ниқобларнинг 134 минг 400 донаси олиб келинган. Ундан 165 минг донадан ортиқ Н95 респираторли ниқоблар, 4 минг дона КН95 ва 100 минг дона уч қаватли ниқоблар ўрин олган.
Таъкидланишича, гуманитар ёрдам республикада коронавируснинг янги тўлқини сабаб кузатилаётган эҳтиёжни қондиришда кўмак мақсадида юборилган.
Қайд этилишича, ушбу инсонпарварлик юкини Ўзбекистонга юбориш харажатлари Пенсильвания штати Филаделфия шаҳрида тадбиркорлик фаолиятини олиб бораётган ўзбекистонлик Фурқат Ражабов ҳисобидан қопланган.
«Бутун ер куррасини қамраб олган коронавирус пандемияси билан боғлиқ вазият ҳеч биримизни бефарқ қолдирмайди. АҚШ жамғармаси томонидан тақдим этилган тиббий ниқобларнинг дастлабки туркумини юртимизга юборишга ҳисса қўшганимиздан мамнунмиз», — дейди Ражабов.
«Тиббий ниқоблар ўрнатилган тартибда республиканинг тегишли тиббиёт муассасалари ўртасида тарқатилади. Шунингдек, ниқобларнинг иккинчи туркуми ҳам тез кунларда Ўзбекистонга олиб келинади», — дейилади хабарда.
Аввалроқ USAID ўзбекистонлик мактаб ўқувчиларига 10 млн долларлик хориж дарсликларини тақдим этгани, Ўзбекистонга АҚШдан коронавирусга қарши 3 млн дозадан ортиқ Moderna вакцинаси келтирилгани, АҚШ Ўзбекистонга 131 тонналик озиқ-овқат ёрдамини топширгани тўғрисида хабар берилганди.
Мавзуга доир: АҚШдан Оролбўйи аҳолиси учун гуманитар ёрдам юборилди
Изоҳ (0)