Токио—2020 Олимпиадасида олтин медални қўлга киритган ўзбекистонлик спортчилар Chevrolet Tahoe, бронза медали эгалари эса Trailblazer автомобиллари билан тақдирланади.
Ижтимоий тармоқларда «Президент совғаси» ёзуви ва Токио Олимпиадаси логотипи туширилган автомобиллар видеоси тарқалди. Видеода учта Tahoe ва иккита Trailblazer автомобилини кўриш мумкин.
9 август куни Токио—2020 Олимпиадасида иштирок этган Ўзбекистон делегацияси Тошкентга қайтиб келади.
Токио Олимпиадасида Улуғбек Рашидов (таэквондо), Акбар Жўраев (оғир атлетика) ва Баҳодир Жалолов (бокс) олтин, Давлат Бобонов (дзюдо) ҳамда Бекзод Абдураҳмонов (эркин кураш) бронза медалига эга чиқди.
Маълумот учун, Chevrolet Trailblazer автомобилининг нархи 304—398 миллион сўм бўлса, Tahoe 595—795 миллион сўм туради.
Эслатиб ўтамиз, Президент фармонига кўра, Токио—2020 Олимпиадасида олтин медалга эга чиққан спортчилар 200 минг доллар, бронза олган спортчилар эса 50 минг доллар миқдорда бир марталик пул мукофоти билан рағбатлантирилади.
Изоҳ (0)