«Аллоҳ сен учун ёзиб қўйган нарса ҳеч қачон бошқа одамга кетиб қолмайди». Бу Баҳодир Жалоловнинг жангдан олдинги гаплари эди. Ҳа, Баҳодир бугун ўзи учун энг катта ғалабани қўлга киритди. Бу йўлда қилинган меҳнат-машаққат ва йўқотишлар ҳам фақат Яратган ва Баҳодирнинг ўзига аёндир. Жалолов орзусига эришди. У Олимпиада чемпиони бўлди! Бундан аввалги Олимпиадада у ўз иштирокини чорак финалда якунлаганди ва уйга медалсиз қайтганди. Ўшанда у онасига «онажон, ҳали кўрасиз, дунёнинг энг зўр спортчиси бўламан, дунёни лол қолдираман. Фақат сиз мени деб ўксинманг», деган.
Мана орадан беш йил ўтди ва жуда кўп нарсалар ўзгарди: Риода у эндигина 22 ёшга тўлган йигитча эди ва ўз услубига эга эмасди. Бироқ бугун кўриндики, Баҳодир аллақачон етук жангчига айланиб улгурган. Шунингдек, алоҳида таъкидлаш керак бўлган жиҳат бор, ўтган йиллар ичида Баҳодирчалик танқид қилинган боксчи бўлмаса керак, кўплаб инсонлар ҳатто унинг салоҳияти ва терма жамоадаги ўрнига ҳам шубҳа қилганди. Лекин Жалолов бугун уларнинг оғзини шунчаки ёпиб қўйди. Унга ишонганлар эса ўзбек баҳодирининг ғалабаси ҳақида оламга жар солмоқда. Яшавор, Баҳодир!
Бундай лаҳзаларда сўзлар ортиқчалик қилиши мумкин. Шу боис, Баҳодир Жалоловнинг орсузи ушалган жанг ва тақдирлаш маросимидан олинган суратларни томоша қилинг.