«Барселона»га қачон қайтиши, «ПСЖ»га ўтиши мумкинлиги ва хотиралар ҳақида. Лионель Месси «Камп Ноу»даги сўнгги матбуот анжуманида кўз ёшларини тия олмади

Лионель Месси 8 август, якшанба куни «Камп Ноу» стадионида «Барселона»дан кетиши муносабати билан матбуот анжуманида қатнашди.

Хайрли кун. Гапира оламанми йўқми, билмайман. Бу ерда нима дейиш ҳақида охирги кунларда жуда кўп ўйладим. Узоқ йилдан сўнг бу ердан кетиш қийин. Бунга тайёр эмасдим. Бюрофакс билан боғлиқ ҳикоя энди тарихда қолди. Менинг ҳозир кетиш ниятим йўқ эди. Қолишимга ишонган эдик. Бу ер менинг уйим. Буни ҳаммадан кўра кўпроқ хоҳлагандим. Бутун ҳаётимни «Барселона»да ўтказдим.

Хайрлашиш маросимимда доим одамлар гавжум бўлади деб ўйлардим. Аммо ҳозирги коронавирус пандемияси даврида буни иложи йўқ.

«Барселона»га қайтиши ҳақида

Қачондир бу ерга клубнинг бир қисми бўлиш учун қайтаман. Бу ерда исталган вазифада фаолият юритиш ва «Барса» дунёнинг энг кучли клуби бўлиб қолиши йўлида қўлимдан келган барча ишни қилишни истайман. Албатта, кўп нарса ёдимдан чиқиб қоляпти. Айни вақтда ўйлаш ва гапириш учун яхши ҳолатда эмасман.

«ПСЖ»га ўтиши мумкинлиги ҳақида

Ҳа, «ПСЖ» — эҳтимолий вариантлардан бири. Лекин ҳозирча ҳеч нарса расман ҳал қилинмади. «Барселона»нинг баёнотидан кейин кўплаб клублардан қўнғироқлар бўлди. Ҳозирча шартнома имзоланмади, фақатгина музокаралар ўтказиляпти.

«ПСЖ» футболчилари билан бирга тушилган сурат шунчаки тасодиф. Улар ҳазиллашиб, «Парижга кел» дейишди. Бу шунчаки ҳазил эди. Улар билан дўстона учрашдим, холос.

Хотиралар ҳақида

Бу клуб қадриятларига хос тарзда ўсдим, бу йўлда камтар бўлиш ва бошқаларга ҳурмат билан муносабатда бўлишга интилдим. Фаолиятим қандай кечгани, қўлга киритилган совринлар, шунингдек, мағлубиятлар учун ҳам миннатдорман. Бу жуда чиройли хотиралар. Ғалабани мухлислар билан бирга нишонлаш, турмуш ўртоғим ва болалар билан биргаликда қувониш. Кўплаб вазиятларни эсда сақлаб қолишим керак.

Қайғудаман. Чунки севган жамоамни тарк этяпман. Буни кутмаган эдим. Ўтган йили кетишни истагандим, аммо шу йил эмас. Шунинг учун хафаман.

Футболчилар «Барселона»га келишда давом этади. Клуб ҳар қандай футболчидан устун, буни қабул қилиш лозим. Аввалига ғалати кўринади, лекин вақт ўтгач, барчаси изига тушади. «Барселона»да ажойиб таркиб бор.

«Барселона» билан муаммоси йўқлиги ҳақида

Ҳақиқатан ҳам бизда муаммо йўқ эди. Клуб билан барча деталларни келишиб олгандик. Ҳеч қандай келишмовчилик бўлмади. «Барса»да қоламан деб ўйлагандим. Лекин Ла Лига қоидаларига кўра бунинг иложи бўлмади.

Буни эшитган вақтимда худди кимдир муздек сувни устимдан қуйиб юборгандек бўлди. Ҳали ҳам бунга кўника олмаяпман.

«Барселона» билан янги келишув шартлари борасида

Маошни 50 фоизга қадар камайтирдим, мендан бошқа ҳеч нарса сўрашмади. Шундан кейин маошни яна 30 фоизга камайтиришни сўраганликлари ҳақидаги хабарлар ёлғон. Бунақаси бўлмади.

Биз барча ишни қилдик, аммо қолишнинг иложи бўлмади. Ҳар доим мухлисларга нисбатан ростгўй бўлганман. Атрофда кўплаб миш-мишлар бор, уларнинг кўпи ёлғон.

«Барса»да қола олмаслиги сабаби ҳақида

Хоан Лапорта бу ҳақда айтди. Биз ҳаммаси борасида гаплашиб олдик, бироқ Ла Лига билан муаммо туфайли қола олмадим. Мен қўлимдан келган барча ишни қилдим. Клуб гап Ла Лигада эканини айтди, лекин қола олмаслигим борасидаги кўплаб сабабларни эшитдим.

Миямда кўплаб фикрлар бор, боши берк йўлдаман. «Барселона»дан кетиб, қандай яшашим борасида ҳозиргача ўйлаб ҳам кўрмаганман. Ҳаётим бутунлай ўзгариб кетади. Асосий жамоа билан 16 йил бирга бўлдим. Ҳаммасини бошидан бошлаш вақти келди.

Бу оилам учун қийин қадам. Бу шаҳар улар учун қандай қулай эканини биламан. Бироқ шунисини аниқки, улар мени олқишлашда давом этади ва ҳаммаси жойида бўлади. Буни қабул қилиш ва шунчаки бошидан бошлаш зарур.

Совринлар ҳақида

Яна битта Чемпионлар Лигаси совринига эга чиқа олмаганимиздан афсусдаман. «Ливерпуль» билан ярим финал ўйинида биз жуда яқин келгандик. Гвардиола қўл остида ярим финалда «Челси»га қарши ўйнаганда ҳам яқин эдик.

Биз яна битта ЕЧЛни қўлга киритишимиз мумкин эди, бироқ мен ҳеч нарсадан афсусланмайман. Мақсадим — ғалабаларда давом этиш. Бир нечта чемпионатда ғолиб чиқишни ва Дани Алвесни (дунёнинг энг совриндор футболчиси) қувиб ўтишни истайман. Энг камида унга яқин келишга ҳаракат қиламан.

Лионель Месси, футболчи

Маълумот учун, Месси «Барселона» тарбияланувчиси ҳисобланади. У 2000 йилдан бери клуб шарафини ҳимоя қилади, 2003 йилдан эса асосий жамоада ўйнайди. У каталон клуби билан Испания чемпионатида 10, Испания Кубоги ва Суперкубогида 7, Чемпионлар Лигасида 4, Европа Суперкубогида ва клублар ўртасидаги Жаҳон Чемпионатида 3 мартадан ғалаба қозонган. Месси фаолияти давомида «Барселона»дан бошқа жамоада ўйнамаган.

У «кўк-анорранглилар» сафида умумий ҳисобда 778 та ўйин ўтказиб, 672 та гол, 305 та голли узатмани амалга оширган. Унинг жамоа билан қўлга киритган совринлари сони эса 35 тани ташкил қилади.

Месси 2020 йилнинг ёзида ҳам клуб раҳбариятидан норози бўлиб жамоадан кетмоқчи бўлган. Бироқ ўшанда қадрдон клуби билан судланишни истамагани учун Каталонияда қолишга қарор қилганди. 34 ёшли аргентиналикнинг «Барселона» билан шартномаси 2021 йилнинг июнь ойи охирида ўз ниҳоясига етганди.