Бугун,

  • USD 11014.01
  • RUB 191.8
  • EUR 10674.78

Ўзбекистон халқи аёлларга кўпроқ овоз беради. Бу ҳақда ХДП лидери Улуғбек Иноятов 7 август куни бўлиб ўтган партия марказий кенгашининг навбатдан ташқари пленумида маълум қилди, дея хабар бермоқда «Дарё» мухбири.

Пленумда асосий масала – Ўзбекистон Президенти сайловида Халқ демократик партияси томонидан номзод кўриб чиқилди ва Мақсуда Ворисова номзод сифатида кўрсатилди.

Улуғбек Иноятов

Улуғбек Иноятов
Фото: «Дарё»

Тадбир давомида ХДП раиси Улуғбек Иноятов журналистларга партия нима учун унинг номзодини тавсия қилмагани бўйича изоҳ берди.

«Биз партиямизнинг стратегиясини янги жиҳатдан ишлаб чиқдик, бу борада жуда кўп экспертлар ва ўзимизнинг фаоллар билан муҳокамалар қилдик. Ҳозир журналистларни ва ҳаммани қизиқтирадиган савол: нима учун партия лидери сайланмади?». Мен ўйлайманки, ҳозир пленумда ўтирган 72 та аъзомизнинг ҳаммасининг юрагида менинг номимни кўрсатармикан партиямиз, деган ҳаяжон бор эди. Лекин партия, биласизки, коллегиал орган. Партияда ҳамма ҳамфикрлар биргаликда фикр билдириши керак. Биз бирлашдик, фикрлашдик ва ўзимизнинг стратегиямизни танладик. Бошқа сиёсий партиялардан фарқли ўлароқ, мана, сизлар кўрдинглар учта партиянинг пленуми ўтди ва улар ўз лидерини танлади. Лекин бизнинг мақсадимиз битта – Президентлик сайловларида ғолиб бўлиш. Халқимиз аёлларга кўпроқ овоз беради ва ХДПнинг сиёсий платформасида ижтимоий масалаларга кўпроқ эътибор қаратилган, шу нуқтаи назардан қараладиган бўлса, биз номзодимизни тўғри танладик ва биз бўлғуси президентлик сайловларда ғалаба қозонишимиз учун бу бир қадам бўлим хизмат қилади деб ўйлайман», — деди ХДП лидери.

Иноятовнинг таъкидлашича, ХДП Президентлик сайловида ғалаба қозониши учун катта имкониятларга эга ва ушбу сайловдаги фаоллик ўз навбатида кейинги парламент сайловларига катта замин яратади.

«Халқимиз бутунлай бошқача фикрлайдиган бўлди. Мана шу сайловлар орқали биз яна бир бор демократияни, очиқлик ва ошкораликни намоён этамиз. Бу янги Ўзбекистоннинг энг катта ютуғи бўлади ва биз ўйлаймизки, партиямиз томонидан кўрсатган номзодимиз, албатта, юқори ўринларни эгаллайди ва биз бу сайловларда катта имкониятга эгамиз. Бу сайловдаги фаол иштирокимиз биз учун кейинги парламент сайловларида катта замин бўлиб хизмат қилади деб ўйлаймиз», — деди ХДП раиси.

Ўзбекистон Президенти сайлови кампаниясига 23 июль куни старт берилган. Мазкур сайловларда иштирок этиши учун 5 та партия – «Адолат» СДП, «Миллий тикланиш» ДП, ЎзЛиДеП, ХДП ва Ўзбекистон Экологик партияси ўз номзодини илгари суриш ҳуқуқига эга. Ҳозиргача барча партиялар ўз номзодини тавсия қилиб бўлди. ХДПдан ташқари Ўзбекистон Президентлик сайловида иштирок этиш учун Экопартиядан партия раиси Нарзулло Обломуродов, «Адолат» СДПдан партия етакчиси Баҳром Абдуҳалимов ва МТДПдан эса партия раиси Алишер Қодиров, Ўзбекистон Либерал-демократик партияси томонидан мамлакатнинг амалдаги раҳбари Шавкат Мирзиёев номзоди илгари сурилди.

Маълумот учун, Ўзбекистон Президентлиги учун сайлов 24 октябрь куни ўтказилади. Сайлов жараёнларига 300 миллиард сўм ва шундан ҳар бир номзодга 3 миллиард сўмдан пул маблағи ажратилиши белгилаб қўйилган.

Изоҳ
Асосий янгиликлар