Россия ва Ўзбекистон махсус бўлинмаларининг ҳарбий хизматчилари афғон чегарасида шартли террорчилар томонидан қўлга олинган аҳоли пунктини озод этиш бўйича қўшма машғулот ўтказди. Бу ҳақда Россия Марказий ҳарбий округига таяниб, «РИА Новости» хабар берди.
«‘Термиз’ полигонида ўтказилган амалий машғулотлар давомида махсус кучлар аҳоли пунктини қуршаб олиш, қуршаб олинган ҳудуддан чиққан шартли террорчилар гуруҳини таъқиб этиш, уларни яксон қилиш ва авиация зарбаларини бериш каби масалалар кўриб чиқилди. Зирҳли техникалардан БТР-82А транспортёри, Ми-35 вертолётлари ва ўқотар қуроллардан фойдаланилди», — дейилади хабарда.
Аввалроқ Тожикистоннинг Хатлон вилоятида Ўзбекистон, Тожикистон ва Россиянинг 2,5 мингдан ортиқ ҳарбийлари иштирокида қўшма машғулотлар бошлангани тўғрисида хабар берилганди.
Тожикистон, Ўзбекистон ва Россия қўшинлари иштирокидаги уч томонлама машғулотлар 5 августдан 10 августгача давом этиши тўғрисида хабар берилганди. 2 август куни Ўзбекистон Мудофаа вазирлиги бўлинмаси машғулот ўтказиладиган жойга колоннада юришни амалга оширган. Қўшни давлат ҳудудида колоннада юришларга Ўзбекистон ҳаво кучларининг Ми-35 жанговар вертолётлари ҳамроҳлик қилган.
Изоҳ (0)