Германия ҳукумати вакиллари Доҳада «Толибон» ҳаракати аъзолари билан махфий учрашув ўтказди. Бу ҳақда Bild нашри ҳукуматдаги манбаларига таяниб хабар бермоқда.
Газета маълумотларига кўра, 31 июль куни Қатар пойтахтида бўлиб ўтган музокараларда Германияга Афғонистон ва Покистон бўйича махсус элчи Яспер Вик вакиллик қилган. Унинг суҳбатдоши Ислом амирлиги («Толибон» ўзини шундай деб атайди) сиёсий бошқармасининг Европа билан алоқалар бўлими бошлиғи мулла Абдулҳақ Восиқ бўлган.
Учрашувда Афғонистонда бўлган гуманитар ташкилотларнинг германиялик ходимлари учун хавфсизлик кафолатлари ҳамда Германиянинг Афғонистондаги халқаро операцияда иштироки чоғида Бундесверга ва Германия федерал полициясига ёрдам берган афғонистонликларнинг ҳолати юзасидан муҳокамалар ўтказилди. Манбаларга қараганда, Вик ўз суҳбатдошида нисбатан «ўртача таассурот» қолдирган.
Билд қайд этишича, Германия Ташқи ишлар вазирлиги кейинроқ «Толибон» билан учрашув ўтказилганини тасдиқлаган. Вазирликдан маълум қилишларича, унинг мақсади Афғонистонаро музокараларни қайта тиклаш ва Афғонистонда сулҳ тузиш масалаларида тезроқ прогрессга эришишдан иборат бўлган.
Идора хабарига кўра, Вик Доҳада ҳам радикал ҳаракат вакиллари билан, ҳам Кобулдаги ҳукумат вакиллари билан учрашувлар ўтказган. «Федерал ҳукумат музокараларни қўллаб-қувватлади… Германия вакиллари ҳар иккала томон вакиллари билан мунтазам музокаралар олиб боради», — деб ёзади газета.
Аввалроқ Хитойда «Толибон» делегацияси ва Хитой ташқи ишлар вазири Ван I ўртасида учрашув бўлиб ўтган эди. Хитой Афғонистондаги барқарорликни тиклаш жараёнида «Толибон»нинг ролини қўллаб-қувватлашга ваъда берди.
Шунингдек, «Толибон» вакиллари Москвада Россия президентининг Афғонистон бўйича махсус вакили ва ушбу мамлакатдаги собиқ элчи Замир Кабулов билан учрашув ўтказиб, Россия дипломатларини Марказий Осиё давлатлари чегараларини бузиш нияти йўқлигига ишонтирган эди.
Бундан ташқари, «Толибон» ҳаракатининг делегацияси Ашхободда бўлиб, Туркманистон Ташқи ишлар вазирлигида музокаралар ўтказган. Туркманистоннинг таклифига биноан амалга оширилган ташриф тўғрисида Ашхобод бирорта расмий хабар бермаган. Аммо Ашхободдаги музокаралар ҳақидаги маълумотни «Толибон»нинг Қатардаги вакили Муҳаммад Наим тасдиқлаган.
Афғонистондан Америка қўшинлари олиб чиқила бошлангандан сўнг «Толибон» Кобул, Қандаҳор, Мозори-Шариф каби шаҳарларга қатор йирик ҳужумлар уюштирди, аммо уларни қўлга кирита олмади. Ўтган ҳафта ҳаракат вакиллари мамлакат чегараларининг 90 фоизини назорат қилаётганини маълум қилди. БМТнинг таъкидлашича, «Толибон» сўнгги 20 йил ичида энг кўп ҳудудларни ўз назоратига олган.
Тўқнашувлар натижасида нафақат қочқинлар, балки чекинаётган ҳукумат қўшинлари ва жангарилар ҳам оммавий равишда қўшни Тожикистон, Ўзбекистон, Покистон ҳудудларига кириб кела бошлади. Ушбу давлатларнинг расмийлари чегараларни мустаҳкамлади. Халқаро ҳамжамият Афғонистондаги зиддиятнинг авж олишини кескин қоралади ва томонларни музокаралар ўтказишга чақирди.
Изоҳ (0)