«Башаракитоб», «Арава Синови», «Пирог Республикаси». Ўзбекистонда машҳур брендлар ўзбекчага таржима қилинганда қандай кўринишда бўларди?

Тошкентнинг Юнусобод ва Яккасарой туманларида «Давлат тили тўғрисида»ги қонун ижросини таъминлаш мақсадида ишчи гуруҳ томонидан 1,5 мингдан ортиқ пешлавҳа, реклама ва эълонлар, кўргазмали бошқа ахборот матнлари ўзбек тилига ўгирилди.

Хусусан, Zarina beauty salon пешлавҳаси «Зарина гўзаллик салони», «Слоённая самса» — «Сомса», бир неча «Аптека» пешлавҳалари «Дорихона», «Всё для дома» — «Ҳамма нарса уй учун», «Магазин домашних деликатесов» — «Тансиқ уй таомлари», «Салон элитной керамики и сантехники» — «Европа керамика ва сантехника буюмлари» деб ўзгартирилган.

«Давлат тили тўғрисида»ги қонуннинг 20-моддасига кўра, лавҳалар, эълонлар, нархномалар ва бошқа кўргазмали ҳамда оғзаки ахборот матнлари давлат тилида расмийлаштирилади ва эълон қилинади ҳамда бошқа тилларда таржимаси берилиши мумкин.

Ушбу тартиб логотип ва товар белгиларига нисбатан татбиқ этилмайди. Яъни «Реклама тўғрисида»ги қонуннинг 5-моддасига биноан, Ўзбекистон ҳудудида реклама Ўзбекистоннинг давлат тилида ёки реклама берувчининг хоҳишига кўра бошқа тилларда тарқатилади. Белгиланган тартибда рўйхатга олинган товар белгилари (хизмат кўрсатиш белгилари), босма усулда терилган бўғинли белгилар (логотиплар) асли қайси тилда бўлса, шу тилда келтирилиши мумкин.

Telegram’даги «Ша всё будет» канали ижодкорлик қилиб, Ўзбекистонда машҳур брендларни ўзбек тилига таржима қилиб кўрди ва натижаларни Instagram’даги саҳифасида тақдим этди.

Эслатиб ўтамиз, 1 июль куни бош вазир Абдулла Арипов барча вазирликлар, идоралар ва ташкилотлар, шунингдек, Қорақалпоғистон Вазирлар кенгаши, Тошкент ва вилоятлар ҳокимликларига лотин ёзувига асосланган ўзбек алифбосига ўтишни тезлаштириш бўйича топшириқ берди.

Вазирлар Маҳкамасининг 2021 йил 10 февралдаги қарори билан лотин алифбосига тўлиқ босқичма-босқич ўтиш бўйича «йўл харитаси» тасдиқланган эди. Унга кўра, ҳозирда кирилл алифбосида юритиладиган барча жой ва кўча номлари, атамалар, ташкилотларнинг номлари, пешлавҳалар, оммавий тарғибот воситалари, реклама ва эълонлар, иш қоғозлари ва турли бланклар 2022 декабрига қадар лотин графикасига ўтказилиши белгиланган.

Бироқ бош вазир қарорига кўра, Ўзбекистон мустақиллигининг 30 йиллиги муносабати билан ушбу вазифани 2021 йилнинг 1 августига қадар бажариш топширилган.