Toshkentning Yunusobod va Yakkasaroy tumanlarida “Davlat tili to‘g‘risida”gi qonun ijrosini ta’minlash maqsadida ishchi guruh tomonidan 1,5 mingdan ortiq peshlavha, reklama va e’lonlar, ko‘rgazmali boshqa axborot matnlari o‘zbek tiliga o‘girildi.
Xususan, Zarina beauty salon peshlavhasi “Zarina go‘zallik saloni”, “Sloyonnaya samsa” — “Somsa”, bir necha “Apteka” peshlavhalari “Dorixona”, “Vsyo dlya doma” — “Hamma narsa uy uchun”, “Magazin domashnix delikatesov” — “Tansiq uy taomlari”, “Salon elitnoy keramiki i santexniki” — “Yevropa keramika va santexnika buyumlari” deb o‘zgartirilgan.
“Davlat tili to‘g‘risida”gi qonunning 20-moddasiga ko‘ra, lavhalar, e’lonlar, narxnomalar va boshqa ko‘rgazmali hamda og‘zaki axborot matnlari davlat tilida rasmiylashtiriladi va e’lon qilinadi hamda boshqa tillarda tarjimasi berilishi mumkin.
Ushbu tartib logotip va tovar belgilariga nisbatan tatbiq etilmaydi. Ya’ni “Reklama to‘g‘risida”gi qonunning 5-moddasiga binoan, O‘zbekiston hududida reklama O‘zbekistonning davlat tilida yoki reklama beruvchining xohishiga ko‘ra boshqa tillarda tarqatiladi. Belgilangan tartibda ro‘yxatga olingan tovar belgilari (xizmat ko‘rsatish belgilari), bosma usulda terilgan bo‘g‘inli belgilar (logotiplar) asli qaysi tilda bo‘lsa, shu tilda keltirilishi mumkin.
Telegram’dagi “Sha vsyo budet” kanali ijodkorlik qilib, O‘zbekistonda mashhur brendlarni o‘zbek tiliga tarjima qilib ko‘rdi va natijalarni Instagram’dagi sahifasida taqdim etdi.
Eslatib o‘tamiz, 1-iyul kuni bosh vazir Abdulla Aripov barcha vazirliklar, idoralar va tashkilotlar, shuningdek, Qoraqalpog‘iston Vazirlar kengashi, Toshkent va viloyatlar hokimliklariga lotin yozuviga asoslangan o‘zbek alifbosiga o‘tishni tezlashtirish bo‘yicha topshiriq berdi.
Vazirlar Mahkamasining 2021-yil 10-fevraldagi qarori bilan lotin alifbosiga to‘liq bosqichma-bosqich o‘tish bo‘yicha “yo‘l xaritasi” tasdiqlangan edi. Unga ko‘ra, hozirda kirill alifbosida yuritiladigan barcha joy va ko‘cha nomlari, atamalar, tashkilotlarning nomlari, peshlavhalar, ommaviy targ‘ibot vositalari, reklama va e’lonlar, ish qog‘ozlari va turli blanklar 2022-dekabriga qadar lotin grafikasiga o‘tkazilishi belgilangan.
Biroq bosh vazir qaroriga ko‘ra, O‘zbekiston mustaqilligining 30 yilligi munosabati bilan ushbu vazifani 2021-yilning 1-avgustiga qadar bajarish topshirilgan.
Izoh (0)