Тошкент шаҳри Яккасарой туманида «ВАЗ-2114» (Lada Samarа) автомобили ағдарилиб кетди, дея хабар бермоқда ЙҲХББ.

Фото: ЙҲХББ

Дастлабки маълумотларга кўра, 2021 йилнинг 31 июль куни соат 16:20 ларда Яккасарой тумани Муқумий кўчасида ҳайдовчи, 1981 йилда туғилган Х.Т. «ВАЗ–2114» русумли автомобилда ҳаракатланаётиб бошқарувни йўқотган ва транспорт воситаси ағдарилган.

Ағдарилиш оқибатида автомобилда ёнғин юзага келган. Ёнғин ўт ўчирувчилар томонидан бартараф этилган.

Мазкур ҳодиса натижасида бир нафар йўловчига биринчи тез тиббий ёрдам кўрсатилган.

Ҳолат юзасидан Тошкент шаҳар ИИББ ЙҲХБ ходимлари томонидан суриштирув олиб борилмоқда.

Бундан аввал Қарши шаҳрида ҳаракатланиб кетаётган автомобиль ёниб кетгани, Сурхондарёдаги метан заправкада «УАЗ»га ўрнатилган газ баллони портлаб кетгани ҳамда Тошкентда йўловчи ташувчи «Газель» ёниб кетгани ҳақида хабар берилганди.