Кубада олти нафар таниқли ва нуфузли генерал деярли бир вақтда вафот этди. Ўлимларнинг расмий сабаби коронавирус, аммо кўпчилик бунга шубҳа билан қараган, деб ёзмоқда «Сегодня».
10 кун ичида олти юқори мартабали ҳарбий вафот этди, уларнинг барчаси Фидел Кастронинг маслакдоши ва Куба инқилобининг қаҳрамони эди. Расмий Гавана баёнотига кўра, улар ҳозирда оролда авж олган коронавирус пандемиясининг қурбони бўлган.
Нашр ҳарбийларнинг табиий ўлимига шубҳа билан қараган бир қанча сиёсатшуносларнинг фикрини йиғди.
«Генераллар Кубада бошланган фаол норозиликлар туфайли ўтказилган умумий йиғилишдан сўнг COVID-19 билан касаллангани айтилди», — дейди халқаро сиёсатшунос Кирилл Барашков.
Марҳумларнинг барчаси 70 ёшдан ошган, уларни ҳақиқатан ҳам глобал пандемия туфайли вафот этган деб тахмин қилиш мумкин. Бироқ ўз ўрнида шубҳалар туғилади, чунки бутун Куба хавфсизлик кучлари коронавирусга қарши эмланган, улар учун биринчи навбатда вакцина сотиб олинганди.
«Ишончим комилки, бу генераллар эмланган ва тиббий ёрдам олган. Улар махсус клиникалардаги махсус тақсимот марказларининг барча афзалликларидан баҳраманд бўлган бўлиши мумкин. Бир вақтнинг ўзида бир нечта таниқли генералларнинг ўлими шуни кўрсатадики, сиёсий раҳбарият ёки раҳбарият қўлидаги бирор киши эҳтимол, амалдаги президентга қарши туриши мумкин бўлган фондистларни йўлдан олиб ташлаган», — деди сиёсатшунос Виталий Кулик.
Мутахассисларнинг таъкидлашича, Кубанинг амалдаги президенти Мигел Диас-Канел ўтирган ўриндиқ чайқалмоқда.Вафот этган генераллар эса кубаликларнинг ҳурматига сазовор бўлган ва улар ҳарбий тўнтаришга етаклаши мумкин эди.
Шу сабабли, президент ҳокимиятни ушлаб қолиш мақсадида кадрларни тозалаш амалиётини ташкил қилганликда гумон қилинмоқда. У ҳолда бу мамлакат тарихида Фидел Кастро инқилобидан буён биринчи тозалаш амалиёти бўлади.
Маълумот учун Фидел Кастро — кубалик инқилобчи, давлат арбоби, сиёсий ва партиявий раҳбар бўлган, 1959 йилдан 2008 йилгача Кубани бошқарган. Унинг раҳбарлиги остида Куба бир партияли социалистик давлатга айлантирилди, саноат ва хусусий мулк миллийлаштирилди, кенг кўламли ислоҳотлар ўтказилди. Кастро 2016 йил 25 ноябрь куни 90 ёшида вафот этган.
2021 йил 11 июль куни Кубанинг Гавана ва бошқа шаҳарларида бир неча минглаб аҳоли коммунистик ҳукуматга қарши кенг кўламли норозилик намойишларига чиқди. Ушбу намойишлар қарийб 30 йил ичидаги энг йириги деб баҳоланган. Акция иштирокчилари эркинлик, демократия ҳамда коронавирус пандемиясига қарши курашиш учун аҳолини вакциналар билан таъминлашни талаб қилди. Намойишчилар «Эркинлик!», «Йўқолсин коммунизм!» ва «Биз қўрқмаймиз!» каби шиорларни баралла айтган.
Изоҳ (0)