Kubada olti nafar taniqli va nufuzli general deyarli bir vaqtda vafot etdi. O‘limlarning rasmiy sababi koronavirus, ammo ko‘pchilik bunga shubha bilan qaragan, deb yozmoqda “Segodnya”.
10 kun ichida olti yuqori martabali harbiy vafot etdi, ularning barchasi Fidel Kastroning maslakdoshi va Kuba inqilobining qahramoni edi. Rasmiy Gavana bayonotiga ko‘ra, ular hozirda orolda avj olgan koronavirus pandemiyasining qurboni bo‘lgan.
Nashr harbiylarning tabiiy o‘limiga shubha bilan qaragan bir qancha siyosatshunoslarning fikrini yig‘di.
“Generallar Kubada boshlangan faol noroziliklar tufayli o‘tkazilgan umumiy yig‘ilishdan so‘ng COVID-19 bilan kasallangani aytildi”, — deydi xalqaro siyosatshunos Kirill Barashkov.
Marhumlarning barchasi 70 yoshdan oshgan, ularni haqiqatan ham global pandemiya tufayli vafot etgan deb taxmin qilish mumkin. Biroq o‘z o‘rnida shubhalar tug‘iladi, chunki butun Kuba xavfsizlik kuchlari koronavirusga qarshi emlangan, ular uchun birinchi navbatda vaksina sotib olingandi.
“Ishonchim komilki, bu generallar emlangan va tibbiy yordam olgan. Ular maxsus klinikalardagi maxsus taqsimot markazlarining barcha afzalliklaridan bahramand bo‘lgan bo‘lishi mumkin. Bir vaqtning o‘zida bir nechta taniqli generallarning o‘limi shuni ko‘rsatadiki, siyosiy rahbariyat yoki rahbariyat qo‘lidagi biror kishi ehtimol, amaldagi prezidentga qarshi turishi mumkin bo‘lgan fondistlarni yo‘ldan olib tashlagan”, — dedi siyosatshunos Vitaliy Kulik.
Mutaxassislarning ta’kidlashicha, Kubaning amaldagi prezidenti Migel Dias-Kanel o‘tirgan o‘rindiq chayqalmoqda.Vafot etgan generallar esa kubaliklarning hurmatiga sazovor bo‘lgan va ular harbiy to‘ntarishga yetaklashi mumkin edi.
Shu sababli, prezident hokimiyatni ushlab qolish maqsadida kadrlarni tozalash amaliyotini tashkil qilganlikda gumon qilinmoqda. U holda bu mamlakat tarixida Fidel Kastro inqilobidan buyon birinchi tozalash amaliyoti bo‘ladi.
Ma’lumot uchun Fidel Kastro — kubalik inqilobchi, davlat arbobi, siyosiy va partiyaviy rahbar bo‘lgan, 1959-yildan 2008-yilgacha Kubani boshqargan. Uning rahbarligi ostida Kuba bir partiyali sotsialistik davlatga aylantirildi, sanoat va xususiy mulk milliylashtirildi, keng ko‘lamli islohotlar o‘tkazildi. Kastro 2016-yil 25-noyabr kuni 90 yoshida vafot etgan.
2021-yil 11-iyul kuni Kubaning Gavana va boshqa shaharlarida bir necha minglab aholi kommunistik hukumatga qarshi keng ko‘lamli norozilik namoyishlariga chiqdi. Ushbu namoyishlar qariyb 30 yil ichidagi eng yirigi deb baholangan. Aksiya ishtirokchilari erkinlik, demokratiya hamda koronavirus pandemiyasiga qarshi kurashish uchun aholini vaksinalar bilan ta’minlashni talab qildi. Namoyishchilar “Erkinlik!”, “Yo‘qolsin kommunizm!” va “Biz qo‘rqmaymiz!” kabi shiorlarni baralla aytgan.
Izoh (0)