Швейцария Бош прокуратураси Уильям Браудернинг Hermitage Capital Management компанияси томонидан 2011 йилнинг март ойида киритилган даъво бўйича олиб борилаётган жиноий ишни ёпди. Бу ҳақда прокуратура веб-сайтига таяниб «РБК» хабар берди.
Суд ишига 2009 йилда «Матросская Тишина» тергов изоляторида вафот этган адвокат ва аудитор Сергей Магнитский томонидан эълон қилинган ҚҚСни қайтариш ва Россия бюджетидан ўғирликлар билан боғлиқ фирибгарликлар тўғрисидаги маълумотлар сабаб бўлган.
Гумон қилинганидек, 2007 йил охирида Россия солиқ органлари зарарига содир этилган фирибгарлик натижасида умумий қиймати 230 миллион АҚШ долларига тенг бўлган солиқлар асоссиз қайтариб олинган. Ушбу маблағлар гўёки, аввал Россияда, сўнгра бошқа қатор мамлакатларда, шу жумладан, 2008 йилдан 2010 йилгача қисман Швейцарияда «ювилган».
«Россияда Сергей Магнитскийнинг ўлими билан боғлиқ ҳолатлар ва унинг сиёсий оқибатлари, шу жумладан, ‘Магнитский рўйхатлари’ ушбу тергов мавзуси эмас», — дейилади Бош прокуратура хабарида.
Терговчилар Швейцариядаги кўплаб банк ҳисобварақлари тўғрисида маълумот олди, хорижий мамлакатлар, шу жумладан, Молдова, Литва, Россия, Кипр, АҚШ ҳукуматига ўзаро ёрдам бериш тўғрисида кўплаб сўровлар юборди, шунингдек, Швейцарияда ва чет элда кўплаб шахслар билан суҳбатлашди.
Тўпланган маълумотларнинг таҳлили шуни кўрсатдики, тергов давомида Швейцарияда бирор кишига айблов эълон қилиш мумкин бўлган далиллар топилмади, шунинг учун прокуратура ишни ёпишга қарор қилди.
Бироқ тергов жараёнида Швейцарияда музлатилган баъзи активлар Россияда содир этилган қоидабузарлик билан боғлиқлиги аниқланди. Натижада прокуратура 4 миллион Швейцария франкидан кўпроқ (4 миллион доллардан кўпроқ) маблағни мусодара қилишга қарор қилди.
Адвокат ва аудитор Сергей Магнитский Россияда 2008 йилда Hermitage Capital фондининг солиқ тўлашдан бўйин товлаш иши бўйича ҳибсга олинган. У 2009 йилда «Матросская Тишина» тергов изоляторида вафот этди. Вафотидан кейин 2013 йилда айбдор деб топилди. Hermitage Capital раҳбари Уильям Браудернинг сўзларига кўра, тергов изоляторида Магнитскийни ўлдиришган, унинг таъқиб қилиниши аудитор Россия бюджетидан 230 миллион доллар ўғирланишига оид коррупцион схемани фош қилгани билан боғлиқ.
Магнитскийнинг ўлими ва Браудернинг баёнотлари АҚШда «Магнитский акти» қабул қилинишига сабаб бўлди, унинг асосида Россиянинг айрим фуқароларига қарши санкциялар жорий қилинди. Кейинчалик ушбу санкцияларга Европа Иттифоқи, Канада, Буюк Британия ва бошқа мамлакатлар қўшилди. Сўнгги ўн йил ичида Браудер россияликлар томонидан Швеция, Эстония, Австрия ва бошқа мамлакатларда пул ювилиши эҳтимоли бўйича бир қатор текширувларни бошлади.
Россияда солиқ тўлашдан бўйин товлаш бўйича Браудерга қарши жиноий ишлар қўзғатилган. 2013 йилда у сиртдан умумий режимдаги колонияга тўққиз йилга ҳукм қилинган. 2018 йилда унга қарши янги жиноий иш қўзғатилди — Бош прокуратуранинг таъкидлашича, фонд раҳбари солиқлардан қочиш учун трансмиллий жиноий ҳамжамиятни ва шу билан боғлиқ фирибгарлик схемаларини тузган.
2019 йилда Инсон ҳуқуқлари бўйича Европа суди Сергей Магнитский, унинг рафиқаси Наталья Жарикова ва онаси Наталья Магнитскаянинг шикоятини қаноатлантирди. Магнитский 2009 йил 11 июлда — ўлимидан тўрт ой олдин Европа судига ўз номидан шикоят билан мурожаат қилган. Магнитскийнинг беваси 2010 йил март ойида шикоятга қўшилган; аудиторнинг онаси судга 2012 йил августда мурожаат қилган.
Суд Россия ҳукумати қамоқхона раҳбарияти томонидан Магнитскийга нисбатан яшаш ҳуқуқи, ҳибсда сақлаш ва муомала чоғида қийноқларнинг тақиқланиши шартлари бузилишига йўл қўйиб берган деб топди. Европа суди, шунингдек, Россия Магнитскийга нисбатан ҳибсда маъқул муддат сақлаш ва маъқул муддатда адолатли суд қилиниш билан боғлиқ тартиб-қоидаларни бузганини тасдиқлади. Суд икки аризачига 34 000 евро ундириб берди.
Изоҳ (0)