Исроил ҳукумати мамлакатда коронавирусга қарши оммавий қайта эмлаш бошланганини эълон қилди. Исроил бундай қадамни ташлаган биринчи давлатга айланди, деб ёзади Reuters.

Фото: Reuters

Исроилда коронавирусга қарши вакцинанинг икки дозали курсини камида беш ой аввал олган 60 ёшдан катта одамлар Pfizer / BioNTech вакцинасининг учинчи дозаси билан қайта эмланади.

Расмийлар қайта эмлаш заруратини мамлакатда дельта («ҳиндча») штаммнинг тарқалиши билан изоҳлади.

Жаҳон соғлиқни сақлаш ташкилоти учинчи доза билан қайта эмлашнинг самарадорлиги ва хавфсизлиги борасида етарлича тадқиқотлар ўтказилмагани учун ҳали бундай эмлашни  тавсия этмаяпти.

ЖССТнинг фикрича, бунинг ўрнига, ривожланган давлатлар вакциналарни камбағал давлатлар билан бўлишиши керак. Шу орқали коронавируснинг қайтадан кенг авж олиши ва янги штаммлар пайдо бўлишининг олдини олиш мумкин бўлади.

Йил бошида Исроил вакцинация суръатлари бўйича дунёда етакчи давлатлардан бирига айланганди. Апрель ойига келиб мамлакатда аҳолининг 60 фоизи эмланган эди. Аҳолига кўчада ниқоб тақиш мажбурияти бекор қилинди. Апрель охирига келиб мамлакат касалхоналаридаги коронавирус бўлимларининг барчаси ёпилди.

Сўнгги бир ойда Исроилда дельта штаммининг тарқалиши туфайли касалланиш даражаси кескин ўсди — 10 миллион аҳолига эга мамлакатда ҳозир кунига икки мингга яқин янги касалланиш ҳолати қайд этилмоқда. Июнь ойида кунига бир неча ўнлаб одамлар касал бўлишни бошлаганди.