Сўнгги пайтларда ижтимоий тармоқда винер қилдириш ибораси тез-тез қулоққа чалинмоқда. Ундан нафақат санъат вакиллари, балки ёшлар ҳам кенг фойдаланмоқда. Кимдир уни узоқ муддатли тиш оқартириш воситаси, кимдир эса тишларни текислаш муолажаси дейди. Хўш, аслида винер нима? Процедура кимлар учун, неччи ёшдан фойдаланиш мумкин? Винер қўйдирган киши нималарга амал қилиши лозим? Унинг қандай салбий таъсирлари бор? Хизматдан фойдаланиш нархлари қанча?
Бу ҳақда стоматолог Саидолимхўжа Сайдалиев батафсил маълумот берди.
Тиш винери нима?
Кўпчилик винерни тишларни оқартирувчи процедура сифатида билади. Аммо у нафақат эстетика, балки даволаш учун ҳам қўлланилади. Бунда тишолди қисмини 180—360 градусда оқ қоплама билан қопланади. Унинг ҳам ўзига яраша қалинлиги бўлиб, тиш 0,2—0,5 мм атрофида ёпиб чиқилади.Процедурадан кимлар фойдаланиши мумкин?
Масалан, кимдадир диастема, трема касаллиги бор. Яъни тишларининг ораси очиқ бўлади. Баъзиларнинг эса тишлари қийшиқ ёки болалигидан ранги сариқ кўринишда бўлади. Кулганда, гапирганида ўзини ноқулай ҳис қилади. Шундай камчиликларни винер ёрдамида тўғрилаш, аниқроғи беркитиш мумкин.Яна бир ижобий тарафи винер қилинганда, тишлар кўп чархланмайди, нерви олинмайди.
Аммо охирги пайтларда аксарият беморлар қийшиқ тишларини ҳам «1–1,5 йил брикет тақиб юргим келмаяпти, винер қилиб қўйинг», — дейди.
Баъзан қабулимга 18 яшар қизлар келади. Тиши соғлом, эмали оқ, холати яхши, лекин янада чиройли кўринишни хоҳлайди. Уларга доим тишларининг ҳолати яхшилигини, винер қўйдириш шарт эмаслигини айтаман.
Чунки стоматология бизнес эмас. Ҳар бир процедура, албатта, фойда бериши керак. Винер қилиш экан деб келган одамга қилиб кетавериш ярамайди.
Винер неча ёшдан тавсия этилади?
Имкон борича барчага стоматологик қопламалардан 18—20 ёшдан кейин фойдаланишни тавсия қиламиз.Тўғри, айрим ҳолларда 15—16 ёшдан бошлаш ҳам мумкин, лекин кўпчиликда 18—25 ёш оралиғида ақл тиши чиқа бошлайди. Унга жой керак бўлиб, тишларнинг жойлашуви сурилади. Кимнингдир жағида жой бўлади, кимдадир эса йўқ.
Қолип, винерлар эса тишларнинг орасига кириб туради. Бир марта қўйдирганингиздан кейин улар шундай қотади. Ақл тиши чиқиб, тишлар сурилгани натижасида эса винер сурилмай синиб кетади ёки тиш блокланиб қолади.
Шунинг учун винер хизматидан мен 22 ёшдан кейин фойдаланишни маслаҳат бераман.
Тишни оқартиришни винердан нима фарқи бор?
Тиш оқартириш муолажаси винернинг маълум бир даражада ўриндоши ҳисобланади. Бунда тишлар турли аппаратлар ёрдамида оқартирилади. Айтишим лозимки, мазкур процедуранинг ҳеч қандай даволовчи хусусияти йўқ, фақат гўзаллик учун қилинади.Тишни оқартирган киши бир ой давомида қизил, аччиқ шўр, газли, кофе, хуллас рангли, бўялган маҳсулотларни истеъмол қилмаслиги зарур.
Процедурадан сўнг тишлар олти ой давомида оппоқ кўринишда бўлади. Агар тишларингизни яхши парвариш қилсангиз, унинг бу ҳолати янада кўпроқ сақланиши мумкин.
Масалан, баъзилар келади, орадан бир йил ўтса-да, тишлари оппоқ туради, баъзилар эса тиш гигиенасига амал қилмагани сабаб олти ойдаёқ унинг ранги ўзгаришни бошлайди.
Винернинг тиш оқартиришдан энг катта фарқи — тиш шаклини ўзгартириши ва оқлигини узоқ муддат сақлаб қолишида. Масалан, бир марта қилинган винер тишларда 10-15 йил давомида туради. Оқартириш процедурасининг эса муддати олти ой. Ҳар йилда бир ёки икки марта мазкур хизматдан фойдаланишингизга тўғри келаверади.
Албатта, винер қўйдирдингиз дегани у 10 йил аниқ туришини англатмайди. Унинг ҳам ўзига яраша амал қилиниши зарури бўлган қоидалари бор. Масалан, иложи борича қаттиқ маҳсулотларни истеъмол қилмаслик керак.
Шундай одамлар бор, ёнғоқни ҳам тишида чақиб ейди. Бу асло мумкин эмас. Биз ҳатто олмани ҳам кесиб ейишни тавсия қиламиз.
Бир нарсани айтиб ўтишим лозим, қабулимга келган аксарият беморлар процедурага «Неча йил кафолат берасиз?» деб сўрашади.
Доим айтадиган гапим, авваламбор, худо. Биз қўлимиздан келганича даволашга ҳаракат қиламиз. Лекин процедураларнинг сизга қанча вақт хизмат қилиши 80-90 фоиз ҳолатларда организмга боғлиқ. Организм қанча ёш бўлса, яхши парвариш қилинса, қўлланган ҳар бир процедуранинг натижаси кўпроқ сақланади.
Яна бир мисол, ёши катта мижозлар келиб, «Мана бу винерни, колонкани қўйдиргандим. 20 йил турди. Бирор марта безовта қилмади. Аммо кейинги қилдирганимга уч йилга бўлмасдан милкларим қочиб кетди. Яхши қўймаган эканда» дейди.
Тўғри, мен ҳамкасбларимни оқламоқчимасман, яхши қўймаган ҳам бўлиши мумкин. Лекин хизматнинг 20 йил давомида яхши турганининг асосий сабаби у аёл тахминан 30-35 ёшларида буни қўйдирган. Ўша ёшида унинг организмида қон айланиш системаси, иммунитет яхши бўлган. Лекин афсуски буни кўпчилик тушунавермайди.
Винернинг салбий таъсири ҳақида
Афсуски, ҳозирги кунда винердан фақат гўзаллик мақсадида фойдаланаётганлар кўпайиб боряпти. Аммо айтиш лозимки, ҳар қандай процердуранинг ўзига яраша салбий таъсирлари ҳам йўқ эмас.Келинг, мисоллар орқали тушунтириб бераман. Масалан, сизнинг тишингизда винерни талаб қиладиган ҳеч қандай муаммолар йўқ эди. Аммо сиз бу хизматдан фойдаланишни истадингиз. Винер тишингизга 180 градус бўйича қопланади, унинг орқа қисми очиқ қолади.
Агар гигиенага амал қилмасангиз аста-секин ўша очиқ қолган қисмлардан кариес келиб чиқиши мумкин. Албатта, бу ҳолат ҳаммада ҳам бўлади демоқчимасман. Лекин 10-15 фоиз ҳолатда содир бўлади.
Хизматларнинг нархи қанча?
Ҳар бир стоматолог ўзининг ишига, харажатига қараб нарх белгилайди. Масалан, клиника шаҳар марказида бўлгани учун ижара ҳақи ҳам шунга яраша.Ўзбекистонда винер қўйиш нархи ўртача 1,6 миллиондан 4 миллион сўмгача. Тиш оқартириш процедурасининг нархи эса ўртача 3,2 миллиондан 5,5 миллион сўмгача белгиланади.
Изоҳ (0)