Тозалаш учун дўкондан ортиқча маблағ сарфлаб турли кимёвий воситалар харид қилиш ўрнига уй шароитида тайёрланган табиий воситалардан фойдаланиш тавсия қилинади.
Чангларни йўқотиш учун спрей
Бундай спрейни дўкондан сотиб олиш шарт эмас, уй шароитида ҳам тайёрласангиз бўлади.
Бунинг учун қуйидагилар керак бўлади:
- сув — 1 стакан;
- сирка — 0,25 стакан;
- зайтун ёғи — 1 чой қошиқ;
- эфир ёғи — 10-15 томчи;
- пуркагич (пулверизатор).
Барча суюқлик ва ёғларни пуркагичли идишга солиб яхшилаб силкитинг. Тайёрланган воситадан фойдаланиш жуда ҳам осон. Суюқликдан озгинасини мебель юзасига пурканг ва қуруқ латта билан артинг.
Печни тозалайдиган восита
Печ устидаги ёғ ва чиркларни тозалайдиган воситалар биринчидан қиммат, иккинчидан эса саломатликка хавф соладиган кимёвий бирикмалардан тайёрланган бўлади. Шу сабаб ҳам уни уйда тайёрлаш айни муддао ҳисобланади.
Бунинг учун қуйидагилар керак бўлади:
- нашатир спирти;
- махсус идиш;
- сув;
- идиш ювишда фойдаланиладиган восита;
- икки томонлама губка;
- қўлқоплар.
Печни 65 даражагача қиздиринг. Бу вақтда сув қайнатинг. Идишга бир стакан нашатир спирти солиб, печнинг тепа қисмига, қайнаган сувли идишни эса пастки қисмига қўйинг. Печни ўчиринг ва тахминан 2-3 соатга қолдиринг. Эҳтиёт чораларига риоя қилишни унутманг. Печингиз газда ишлайдиган бўлса, нашатир спиртли идишни қўйишдан аввал печни ўчиринг. Вақт ўтиб идишларни ичидан олганингиздан кейин печ эшигини 15 дақиқага очиқ қолдиринг. Нашатирли идишга 1-2 чой қошиқ идиш ювадиган восита ва 1 литр иссиқ сув қўшинг. Қўлқопларни кийиб печнинг ички ва ташқи томонини мазкур аралашма билан намланган губкада артинг.
Гиламларни ювиш учун кукун
Табиий маҳсулотлардан тайёрланадиган восита гиламни чанг ва ҳидлардан тозалаш учун асқатади.
Бунинг учун қуйидагилар керак бўлади:
- бура (танакор; дорихоналарда сотилади) — 0,5 стакан;
- ичимлик содаси — 0,5 стакан;
- эфир ёғи — 30 томчи.
Бурага ичимлик содаси солиб аралаштиринг, унга 30 томчи эфир ёғи қўшинг. Яхшилаб аралаштиргандан кейин уни пластик ёки шиша контейнерга солинг. Гиламни тозалаш учун кукунни сепиб 15-20 дақиқага қолдиринг. Кейин эса чангюткич билан тозаланг.
Моғорларга қарши восита
Моғорларни бартараф қилиш учун қуйидагилар керак бўлади:
- чиннигул — 1 чой қошиқ;
- зайтун ёғи — 1 стакан;
- дока;
- ип;
- шиша банка;
- фольга;
- металл ёки шиша идиш;
- пуркагич.
Чиннигулни блендерда майдаланг. Докани тўрт марта букланг ва ўртасига янчилган чиннигулни солинг, четларини бирлаштириб ип билан боғланг. Шиша банкага зайтун ёғи, унга чиннигулли докани солинг. Банкани устини фольга қоғоз билан ёпинг. Аралашмани иссиқ сув солинган идишнинг буғига тутинг. Кейин докани олинг, ёғдан эса тозалаш мақсадида фойдаланинг. Моғорни кетказиш учун аралашмани пуркагич орқали сепинг, 20 дақиқадан кейин қуруқ салфетка билан артиб ташланг.
Изоҳ (0)