Фарғона вилояти ҳокими Хайрулло Бозоров бир ойдан ортиқ даврдан бери жамоатчилик кўриниш бераётгани йўқ. 28 июль куни эса ижтимоий тармоқларда ҳоким тадбиркордан 400 минг доллар пора олаётган вақтида қўлга тушгани, шу сабабли ҳам кўринмай қолгани ҳақида хабарлар тарқалди.
Фарғона вилояти ҳокимлиги матбуот котиби Дилмурод Жумабоевнинг «Дарё»га маълум қилишича, ҳоким Хайрулло Бозоров 27 июндан буён Тошкент шаҳрида чуқурлаштирилган тиббий даволанишда. Қайд этишларича, Бозоров пойтахтда секвестрланган бел умуртқа чурраси ташхиси билан бел соҳасида кичик жарроҳлик амалиёти ўтказган.
«Хайрулло Бозоров ҳозирда стационар шароитда реабилитация жараёнини ўтказмоқда, ишларни масофадан онлайн тарзда мувофиқлаштириб бормоқда. Яқин кунларда вилоят ҳокими одатий иш фаолиятига қайтишини маълум қиламиз», — дейилади вилоят ҳокимлиги матбуот хизмати ахборотида.
Айни вақтда, Фарғона вилояти ҳокимлиги жамоатчиликдан ижтимоий тармоқларда ҳоким Хайрулло Бозоров билан боғлиқ тарқалаётган миш-мишларга ишонмасликни сўраб, ёлғон ахборот тарқатганлик учун маъмурий ва жиноий жавобгарлик кўзда тутилганини эслатиб ўтган.
Изоҳ (0)