Жиноят ишлари бўйича Хонобод шаҳар суди шаръий никоҳдаги эри бошқага уйланаётганини эшитиб, уни ўлдирган аёлга ҳукм ўқиди. Бу ҳақда «Дарё»га вилоят суди ахборот хизмати хабар берди.
Маълум бўлишича, Янгийўл туманида яшовчи Зулхумор Умарова (исм-шарифлар ўзгартирилган) 2020 йилнинг май ойида Тошкент шаҳрининг Сирғали туманидаги новвойхонада Мурод Юсупов билан танишиб, бир-бирини ёқтириб қолган. Ва шаръий никоҳ асосида турмуш қуриб, июль–сентябрь ойларида ижарага уй олиб, бирга яшаган. 2020 йилнинг 29 сентябрь куни Мурод Тошкентда ишлари юришмаётганини, шу сабабли Жиззахга ишлаш учун кетаётганини айтиб, уйидан чиқиб кетган. Ана шундан кейин жуфтлик ўртасига совуқлик тушган. Зулхумор эрига қўнғироқ қилганида баъзан жавоб бермай, баъзида эса ўзи қўнғироқ қилишини айтиб, телефонини ўчириб қўйган. Шундан сўнг аёл Жиззах шаҳар ИИБга мурожаат қилиб, эри бир неча кун олдин Тошкентдан Жиззахга новвойчилик қилиш мақсадида чиқиб кетганини айтиб, уни топиб беришларини сўраган. Сўнгра ўзи ҳам Муродни қидириб Жиззахга борган ва бир неча кун юриб, уни тополмагач, қайтаётганида эри унга қўнғироқ қилиб, Бухорода эканини айтган ҳамда хотинидан уйга қайтишни сўраган.«20 октябрь куни Муродга қўнғироқ қилдим. Шунда у томондан чақалоқ йиғиси эшитилди. Ундан қаердалигини, чақалоқ кимнинг фарзанди эканини сўрадим. У эса ҳеч қандай чақалоқ йўқлигини, ёнидаги аёлларнинг овози эканлигини айтиб, жаҳл билан телефонни ўчирди. Муроднинг опасига қўнғироқ қилиб, гаплашганимда уни уйлантиришаётганини эшитдим. Шунда алданганлигимни билдим. Хўрлигим келиб, ўша пайтнинг ўзидаёқ Андижонга кетиш учун танишим Дилёрга қўнғироқ қилиб, онам бетоблигини, шу сабабли унинг ҳолидан хабар олиш учун бориб келишим кераклигини айтиб, йўлда шерик бўлишга кўндирдим. Шу куни тунги ўн бирларда Андижонга етиб келиб, ҳали битмаган меҳмонхоналардан бирига жойлашдик. Тонгги соат 04:00 да меҳмонхонадан чиқиб, Тошкентга қатновчи ҳайдовчи билан гаплашиб, унга Избоскан туманида беш дақиқали ишим борлигини айтиб, йўлга чиқдик. Тонг ёришар вақтда манзилга етиб бордик. Муродга қўнғироқ қилиб, уйини топиб келганимни, айни пайтда дарвозаси олдида турганимни, ўзи чиқмаса, ота-онасининг олдига киришимни айтдим. Шундан сўнг у уйидан чиқиб, биз келган машинага ўтирди. Биргаликда профилактика инспектори хонасига бордик. Мурод машинадан тушибоқ мени яхши кўришини, мажбуран уйдагилар учун уйланаётганлигини, бироз сабр қилиб, тўй ўтишини кутиб туришимни сўради. Келинни уйдагиларига топшириб, 10-15 кундан сўнг Тошкентга қайтиб боришини айтиб, тинчлантиришга ҳаракат қилди. Шунда ундан икки-уч соат вақтини ажратишини сўрадим. У рози бўлди ва шаҳарга йўл олдик», — дейди судланувчи Зулхумор Муродова.
Қайд этилишича, аёл шарманда бўлган ҳолда уйига қайтишни истамай, Андижон шаҳридаги қурилиш моллари дўконига кириб, ёғоч сопли пичоқ сотиб олади ва курткасининг ичига яширади. Жуфтлик кўчаларни айланиб, сўнгра чекка ҳудуддаги дала майдонига боради. Шу пайт Мурод эгнидаги қалин кийимини ечиб, ғўзапояга илиб қўяди. Зулхумор эса эгнидаги костюмини ечиб ерга ташлаб, Муродга ўгирилган ҳолда ўтиришни, елкаларини уқалаб қўйишини айтади. Эркак ўгирилганда эса орқа биқин соҳасига икки марта пичоқ санчади. Шунда Мурод у томонга қайрилиб, бўйнидан бўғиб, қўлидаги пичоқни олмоқчи бўлганида аёл чап елка соҳасига яна бир марта пичоқ урган.
«У ҳолсизланиб, ерга ўтириб қолди. Танасидан пичоқни олиб, пахтазор томонга улоқтирдим ва уни бошқа аёлга бериб қўйишни истамаганим учун шундай қилишга мажбур бўлганимни айтиб, ундан узр сўрадим. У эса тез ёрдам чақириб, у ердан кетишимни, бўлган ҳолатни ҳеч кимга айтмасдан, ўзимга тегишли бўлган барча нарсаларни олиб кетишимни айтди», — дейди судланувчи ўз кўрсатмасида.
Суд Зулхумор Умаровани Жиноят кодексининг 97-моддаси 1-қисми (қасддан одам ўлдириш) билан айбдор деб топиб, унга 10 йил муддатга озодликдан маҳрум қилиш жазосини тайинлади. Тайинланган жазо умумий тартибли колонияларда ўталиши белгиланди.
Изоҳ (0)