Қарши халқаро аэропортидан Россиянинг Санк-Петербург шаҳрига учиши лозим бўлган самолёт юки оғирлиги сабаб рейс қолдирилгани, йўловчилар бундан норози экани ҳақида хабар берилганди. «Дарё» мухбири билан суҳбатлашган йўловчиларнинг айтишича, мақола сайтда эълон қилингач, масъуллар зудлик билан воқеа жойига етиб келган.
«Аэропорт бошлиғининг ўринбосари келиб, биз билан суҳбатлашди. Шу рейсдан қолиб кетганларнинг билет пули қайтарилишини, барча харажатлар қоплаб берилишини айтишди», — дейди йўловчи Дилшод Хуррамов.Йўловчилар томонидан «Дарё»га тақдим этилган видеодан маълум бўлишича, йўловчилардан бири аэропортга келгунча ҳам харажат қилганини, СОVID-19’га тест топшириб, натижаси ёзилган маълумотнома олиш учун ҳам харажат қилганини, маълумотнома муддати ўтиб қолишидан қўрқаётганини билдирган.
«Бу бизнинг айбимиз билан содир бўлди. Барча харажатлар, ўша СОVID-19’га тест топшириб, натижасини олган маълумотномангиз муддати бугун кечга қадар ўтиб қолса, унинг харажати ҳам қоплаб берилади», — деган масъул эканлиги айтилган шахс.
Дилшод Хуррамовнинг маълумот беришича, аэропорт масъуллари йўловчиларни кутиш залига олиб кириб, уларга бепул овқат ва сув берган.
«Энди кечгача меҳмонхонага бориб, дам олиб туришимизни таклиф қилишмоқда. Лекин, кўпчилик бунга қарши. Боиси, аэропортдан чиқсак, кириш-чиқиш рўйхатга олинади ва манзилимизга боргач, аэропортга нега такрорий кириб-чиққанимиз ҳақида савол бўлади. Буни билганлар аэропортдан чиқмай кутамиз дейишмоқда», — дейди Дилшод Хуррамов.
Мазкур ҳолат ҳақида расмий маълумот берган «Uzbekistan Airports» АЖ матбуот хизмати ҳаво кемаси экипажи командири самолёт юки оғирлиги боис, ушбу қатнов бажарилмаслиги ҳақида қарор қабул қилганини маълум қилди.
Қайд этилишича, йўловчиларга Қарши аэропортининг масъул ходимлари ҳамда «Azur Air» авиакомпанияси самолёти экипажи томонидан ушбу қарорга сабаб бўлган ҳолатлар ҳақида маълумот берилган.Масъул ташкилот матбуот хизматининг аниқлик киритишича, Қарши халқаро аэропортида сарсон бўлган йўловчилар сони 214 нафар кишини ташкил қилади.
Изоҳ (0)