Таэквондо бўйича Токио—2020 Олимпиадасида ўзбекистонлик 19 ёшли Улуғбек Рашидов финал баҳсида мусобақанинг иккинчи рақамли спортчиси британиялик Бредли Синденни мағлуб этиб, олтин медалга сазовор бўлди. «Дарё» мухбири Токиода бўлиб турган Улуғбек Рашидовнинг мураббийи Павел Хан билан боғланишга муваффақ бўлди ва унга бир қатор саволлар билан мурожаат қилди.
Улуғбекнинг характери ва унинг кучли томонлари ҳақидаПавел Хан Улуғбек Рашидовни 6 ёшидан бери шуғуллантиради ва улар узоқ йўлни босиб ўтган. Спортчининг ўзи мураббийи ҳақида шундай дейди:Унинг кучли томони сифатида руҳий томондан жуда барқарор эканлигини айтиш мумкин. Шунингдек, Улуғбек ностандарт техникага эга.
Улуғбекнинг футбол билан шуғулланишни хоҳлагани ва мураббий уни таэквондода қандай олиб қолгани ҳақида
Ҳа, у футбол ўйнашни хоҳлаган пайт бўлган. Аммо мен Улуғбекни ва унинг ота-онасини таэквондода қолишга ишонтиришга муваффақ бўлганман. Мен Улуғбекнинг ота-онаси билан гаплашдим ва менга ишонишларини илтимос қилдим, боиси катта ютуқларга эришишимизни ҳис қилгандим.
Улуғбек билан биргаликда қандай қийинликларни бошдан ўтказгани ҳақида
Ростини айтсам, орзуга эришиш йўлида жуда кўп қийинчиликлар бўлган. Аммо буларнинг барчаси иш жараёнининг бир қисми. Худога шукр, давлат, Олимпия қўмитаси, Спорт ва туризм вазирлиги, Мудофаа вазирлиги ва Таэквондо ассоциациясининг кўмаги туфайли биз учун ҳамма нарса кўнгилдагидек бўлди. Шунингдек, рақибларимизни ўрганиш жараёнида бизга катта ёрдам берган терма жамоа мураббийлар штабини ҳам таъкидлаб ўтишни истардим.
Мусобақадан олдин устоз ва шогирднинг имкониятларини паст баҳолаганлар бўлган ё бўлмагани ҳақида
Ўйлайманки, бундай бўлмаган, чунки барча ўзбекистонлик таэквондочилар бизнинг ҳам Олимпиада медалига эга бўлишимизни хоҳлади. Бу ҳар биримизнинг орзумиз эди.
Павел Хан, Олимпиада чемпиони Улуғбек Рашидовнинг мураббийи
«Бу мураббий менга жуда яқин. У қадрдоним. Унинг қўл остига келганимда 5-6 ёшда эдим. Бу йўлни у билан бирга босиб ўтдик. У энг зўр мураббий! Уч йил аввал ёшлар Олимпиадасида бу каби ютуқни қўлга киритамиз деб ўйлаб ҳам кўрмагандик. Бироқ ҳаммаси худонинг қўлида. Унга дуо қилинг ва албатта, натижа эришасиз».
Маълумот учун, 19 ёшли Улуғбек Рашидов Ўзбекистон тарихида Олимпиада медалини қўлга киритган энг ёш спортчи бўлди. Бундан ташқари Олимпия ўйинларида олтин медалга эга чиққан энг ёш (19 ёш 4 ой-у 2 кунлик) спортчи мақомига ҳам энди унга тегишли. Аввал бу икки мақом Рио—2016 Олимпиадаси ғолиби Ҳасанбой Дўстматов (23 ёш 1 ой-у 20 кунлик) ва Афина—2004 Олимпиадаси брона медали соҳиби Баҳодир Султоновга (19 ёш 7 ой-у 14 кунлик) тегишли эди.
Изоҳ (0)