Лондонда 25 июль куни бошланган кучли ёмғир туфайли кўчаларни, ерости йўллари ва метро станцияларини сув босди. Ёғингарчилик оқибатида саккизта метро ва битта ерусти темир йўл линиясининг станцияси ёпилган.
BBC News каналининг хабар беришича, қутқарув хизматларига бир неча соат ичида уч юзга яқин мурожаат келиб тушган, уларнинг аксарияти йўлларнинг ва уйларнинг сув босиши ҳақида.
«Лондонда Квенстаун-роуд бўйлаб ҳаракатланаётган икки қаватли автобус темир йўл кўпригининг остига тиқилиб қолган, автобус салонига сув кира бошлаган», — деб хабар бермоқда AFP мухбири автобус ҳайдовчисига асосланиб. Йўловчилар автобусни тарк этишга мажбур бўлган, йўл ёпилган.
«Сув тошқини туфайли Лондонда кўплаб йўллар, жумладан, Блекуол ерости йўли, А12 автомагистрали ва Шимолий ҳалқа магистралининг бир қисми ёпилди. Бошқа йўналишларда узоқ муддатли тирбандлик кузатилмоқда», —деб ёзади ОАВ.
Лондон ўт ўчирувчилар бригадаси пойтахт шарқидаги Саут-Вудфорд туманидаги тошқинларни тозалаш учун полиция билан иш олиб бораётганини маълум қилди.
«Ёғингарчилик туфайли Буюк Британиянинг Метеорология хизмати куннинг охиригача Англия ғарбида, жануби-ғарбида ва жануби-шарқида шунингдек, пойтахтда хавфнинг сариқ даражасини жорий қилди. Маҳаллий вақт билан соат 19:00 гача (Тошкент вақти билан 23:00) хавфнинг энг юқори, тўқ сариқ даражаси амал қилган», — дейилади ўт ўчириш хизмати Twitter’ида.
The Independent нашрининг ёзишича, Британиядаги тошқинлар Лондон жанубидаги Клепхем ва Камбервелл ҳудудларига энг кўп зарар етказган.
Ўз навбатида, Blik нашри Швейцарияда ҳам, асосан, мамлакатнинг марказий қисмида кучли ёмғир ва момақалдироқ юз бергани ҳақида хабар қилмоқда. Сув тошқини ҳудудлар ўртасидаги темир йўл алоқаларини узиб қўйган. Мамлакатда йўлларни сув босган, кўплаб автомобиллар қисман сув остида қолган. Шу билан бирга, Цуг кантонига дўл ёғган. Бешта муниципалитетдаги кўчалар, ертўлалар ва ерости гаражлари сув остида қолган.
Изоҳ (0)