Чет элда доимий истиқомат қилаётган Ўзбекистон фуқароларига давлат хизматларидан онлайн фойдаланиш имконияти тақдим этилади. Президент томонидан 24 июль куни имзоланган фармон талабларига кўра, улар давлат божи ва бошқа тўловларни чет эл валютасида халқаро тўлов тизимлари орқали тўлаши мумкин бўлади.
«Gazeta.uz»нинг ёзишича, ҳужжатга мувофиқ, 2021 йил 1 октябрга қадар:
- «Ижтимоий ҳимоя ягона реестри» ҳамда «ТМЭК» ахборот тизимлари Ягона интерактив давлат хизматлари портали (ЯИДХП, Ягона портал) билан интеграция қилиниши таъминланади;
- давлат хизматлари марказлари ёки ЯИДХП орқали давлат хизматлари кўрсатилишида тўловлар бўйича имтиёзга эга бўлган шахсларни реал вақт режимида аниқлаш ва тўлов миқдорини автоматик тарзда белгилаш тизими жорий этилади.
Фармонда белгиланишича, хориждан туриб электрон давлат хизматларидан фойдаланганда давлат божлари, йиғимлар ва бошқа ҳар қандай тўловларни чет эл валютасида халқаро тўлов тизимлари ва бошқа воситалар орқали амалга ошириш механизми йўлга қўйилади.
Изоҳ (0)