Япониянинг Токио шаҳри мезбонлик қилаётган Олимпиадада 25 июль куни таэквондо бўйича финал баҳслари ўтказилди.
Ҳал қилувчи баҳсда ўзбекистонлик таэквондочи Улуғбек Рашидов британиялик рақиби Бредли Синденни мағлуб этиб, Токио Олимпиадасида Ўзбекистонга илк олтин медални тақдим этди.
Рашидов уч раунд якунига кўра 32:29 ҳисобида ғалаба қозонди. Шу тариқа у таэквондо бўйича Олимпиадада чемпион бўлган илк спортчи сифатида Ўзбекистон тарихига кирди.
Улуғбек ярим финалда Босния ва Герцеговина вакили Недзад Ҳушични 28:5 ҳисобида енгиб, Ўзбекистон учун дастлабки медални нақд қилганди. Синден эса ярим финалда хитойлик Шуаи Жаони 33:25 ҳисобида енгди.
Синден ўз юришини 1/8 финалдан бошлади ва унда Янги Зеландия вакили Том Бёрнсга имкон қолдирмади (53:8). Чорак финалда эса британиялик спортчи туркиялик Хоқон Речберни 39:19 ҳисобида таслим этди.
Улуғбек 1/16 финалда малилик Сейду Мофанани 38:17 ҳисобида мағлуб этди. Ўзбекистонлик спортчи чорак финал йўлланмаси учун жангда 3 карра жаҳон чемпиони, Олимпия ўйинларининг 2 карра совриндори, ушбу вазн тоифасининг биринчи рақамли спортчиси жанубий кореялик Ли Де Ҳун билан асосий вақтда 19:19 ҳисобида қайд этди. Баҳс тақдирини ҳал қилган «Олтин зарба»да Рашидов 2 очко қўлга киритиб, чорак финалга йўл олди. Рашидов 1/4 финалда эронлик Мирҳошим Ҳуссаинини 34:22 ҳисобида енгди.
Рашидовнинг финалдаги рақиби Бредли Синден -68 кг вазн тоифасида амалдаги Жаҳон чемпиони ҳисобланади. У 2019 йилда Манчестер шаҳрида ўтказилган мусобақада ғолибликни қўлга киритганди. Синден, шунингдек, ушбу вазн тоифасининг иккинчи рақамли вакили ҳисобланади.
Маълумот учун, Улуғбек Рашидов 2002 йил 23 март куни Тошкент шаҳрида туғилган.
У 2018 йилда Буэнос-Айресда (Аргентина) бўлиб ўтган 2018 йилги ёзги ўсмирлар Олимпия ўйинларида 48 килограммгача вазн тоифасида кумуш медалини қўлга киритган, финалда россиялик спортчи Дмитрий Шишкога имкониятни бой бериб қўйган.
2019 йилда эса таэквондо бўйича ўсмирлар ўртасидаги Осиё чемпионатида 55 килограммгача вазн тоифасида олтин медалга эга чиққан. Худди шу йили у Бутунжаҳон армия ўйинларида 58 килограммгача вазн тоифасида олтин медални қўлга киритади, Улуғбек ҳал қилувчи баҳсда хитойлик рақиби Лян Юйшуайни таслим этганди.
Изоҳ (0)