24 июль куни Ўзбекистон Президенти Шавкат Мирзиёев ва Тожикистон президенти Эмомали Раҳмоннинг телефон орқали мулоқоти бўлиб ўтди. Бу ҳақда давлат раҳбари матбуот хизмати хабар берди.
Суҳбат аввалида Тожикистон президенти Шавкат Мирзиёевни таваллуд куни билан табриклаб, Ўзбекистоннинг кўп миллатли халқига тинчлик-осойишталик, фаровонлик ва равнақ тилаган.
Шунингдек, 10—11 июнь кунлари Ўзбекистон Президентининг Тожикистонга расмий ташрифи якунлари бўйича қабул қилинган битим ва келишувларни амалга ошириш масалалари кўриб чиқилган. Минтақа кун тартиби, шу жумладан, Афғонистондаги вазиятнинг ривожланиши юзасидан фикр алмашилган.
«Ўтган ҳафтада Тошкентда ўтган Марказий ва Жанубий Осиё боғлиқлиги бўйича халқаро конференциянинг муваффақиятли натижалари юксак баҳоланди. Келгуси ойнинг бошида Туркманистонда минтақа давлатлари раҳбарларининг навбатдаги Маслаҳат учрашувини ҳамда жорий йилнинг сентябрь ойида Тожикистонда Шанхай ҳамкорлик ташкилоти саммитини ўтказишга тайёргарлик масаласи муҳокама қилинди», — дейилади хабарда.
Аввалроқ Ўзбекистон Президентининг катта қизи, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари Саида Мирзиёева Шавкат Мирзиёевни 64 ёшга тўлиши муносабати билан табриклаганди.
Изоҳ (0)