Тошкент вилояти Ангрен туманида фуқароларни алдаб, уларнинг пул маблағларини ўзлаштирган шахс ушланди, дея хабар бермоқда ИИВ матбуот хизмати.
Олиб борилган текширув ҳаракатлари давомида номаълум шахс томонидан Telegram’да «Универсал кредит» номли сохта гуруҳ очилиб, 15 дақиқа ичида онлайн кредит хизматлари орқали фуқаролар микроқарз олишлари мумкинлиги ҳақидаги эълон остида фуқароларнинг шахсига оид маълумотларни ноқонуний равишда эгаллаб, уларнинг банк пластик карталаридаги пул маблағларини фирибгарлик йўли билан қўлга киритиб келгани аниқланган.
Олинган тезкор маълумотлар натижасида 2021 йил июль ойида Тошкент шаҳри ҳудудида ИИВ Киберхавфсизлик маркази ходимлари томонидан олиб борилган тезкор-қидирув тадбирлари давомида мазкур ноқонуний ҳаракатни Тошкент вилояти, Ангрен шаҳрида яшовчи, муқаддам Жиноят кодексининг 168-моддаси билан судланган, 1997 йилда туғилган фуқаро Д.К. содир этгани аниқланиб, унинг икки дона телефон қурилмаси ашёвий далил тариқасида тегишли тартибда ҳужжатлаштириб олинган.
Ушбу шахс Telegram’даги «Универсал кредит» номли сохта гуруҳи орқали 15 дақиқа ичида фуқаролар микроқарз олишлари мумкинлиги ҳақидаги эълон остида республика ҳудуди бўйлаб 10 дан зиёд алданган фуқароларнинг жами 13 миллион сўмга яқин пул маблағларини фирибгарлик йўли билан қўлга киритиб, ушбу пулларни ўзининг эҳтиёжи учун ишлатиб юборган.
Мазкур ҳолат юзасидан фуқаро Д.К.га нисбатан Ёзёвон тумани ИИБ ҳузуридаги тергов бўлинмаси томонидан Жиноят кодексининг 168-моддаси (фирибгарлик) билан жиноят иши қўзғатилиб, дастлабки тергов ҳаракатлари олиб борилмоқда.
Бундан аввал Тошкентда фуқаронинг Қозоғистондаги ўқишини Самарқанд тиббиёт институтига кўчириб бериш эвазига 5 минг доллар олган шахс ушлангани, Андижонда Кореяга ишга юборишни ваъда қилиб, 6 минг доллар талаб қилган шахсга жиноят иши қўзғатилгани ҳамда Бухорода «Асакабанк» собиқ мансабдорлари Осиё тараққиёт банки ажратган 2 миллион долларни талон-торож қилгани аниқлангани ҳақида хабар берилганди.
Изоҳ (0)