«Ҳудудий электр тармоқлари» иқтисодчи ва блогер Отабек Бакировнинг «Улар» лойиҳасида Грузиядаги электр энергияси тизимини Ўзбекистондаги ҳолатлар билан солиштиргани борасидаги фикрларига муносабат билдирди.
Бакиров Михаил Саакашвили ислоҳотларидан аввал Грузияда электр энергияси бепул бўлганлиги, лекин унинг ўзи бўлмаганини эслаган. «Бизда реформалар нега бўлмаяпти, десангиз, бизда аввал ‘текин’ эди, лекин бўлмаган. Ҳозир ‘свет’ қиммат, лекин барибир йўқ. Грузия реформасидан фарқимиз шу», — дея таъкидлаган эди у.
«Ўзбекистонда электр энергияси таъминотида, фавқулодда ҳолатларни инобатга олмаса, тақчиллик кузатилмайди. Тўғри, қишнинг совуқ кунлари газ танқислиги сабаб иситиш мосламалари ёҳуд ёзнинг жазирамаси, аномал иссиқ кунларида электр энергияси сарфи юқори бўлган совитиш ускуналаридан фойдаланиш тизимда ишлаб чиқаришга нисбатан истеъмол юкламасини келтириб чиқаради ва натижада маълум муддат узилишлар кузатилади. Бироқ бу, муаллиф таъкидлаганидек, Ўзбекистонда электр энергияси йўқ, дегани эмас», — дейилади «Ҳудудий электр тармоқлари» муносабатида.
Қайд этилишича, иқтисодчи томонидан Грузия ҳамда Ўзбекистон ўртасидаги электр энергияси ишлаб чиқаришдан то уни етказиб беришгача бўлган босқичлар атрофлича таҳлил қилинмаган. «Грузияда электр энергиясининг 75 фоизи, асосан, табиий ресурслардан, бир неча фоиз арзон ва экологик тоза гидростанцияларда ишлаб чиқарилиши, Ўзбекистонда эса бу борадаги имконият умумий электр энергияси ишлаб чиқаришининг 10 фоизини ташкил этиши ҳисобга олинмагани таассуф уйғотади», — дея қўшимча қилинади хабарда.
«Ҳудудий электр тармоқлари»нинг маълум қилишича, Грузия Энергетик платформасининг ҳисоб-китобларига кўра, мамлакатда истеъмол қилинадиган 1741 МВт электр энергиясидан 1129 МВт, яъни 65 фоизи Россия, Озарбайжон ҳамда Туркия давлатларидан импорт қилинади. Ўзбекистонда электр энергияси импорти, асосан, ёзнинг иссиқ кунлари ва қишнинг совуқ кунларида электр тармоқларида юкламанинг кескин ортиши билан боғлиқ бўлиб, умумий истеъмолнинг 7-8 фоизини ташкил этади.
«Бундан ташқари, Ўзбекистонда электр энергияси ишлаб чиқаришнинг бир мунча қиммат усули, яъни иссиқлик электр станциялари ҳиссасига тўғри келиши (87 фоиз) ҳисобга олинса, икки мамлакат ўртасидаги таҳлиллар 2019−2020 йилда аҳоли учун 1 кВт/с электр энергияси тарифи Грузияда — 0,62 сентдан 0,66 сентга ошганини, юртимизда эса бу кўрсаткич 2019 йилдан бери — 0,27 сентдан ўзгаришсиз қолганини ҳам кўришимиз мумкин», — дейилади компания муносабатида.
Ўз навбатида, Отабек Бакиров Telegram’даги канали орқали «Ҳудудий электр тармоқлари»нинг муносабатига жавоб тариқасида Ўзбекистонда электр энергия қиммат эмас, шунинг учун дефицит деган нотўғри тушунча шаклланиб қолганини таъкидлаган.
Унинг қайд этилишича, электр энергия дефицитлигининг бош сабаби бозор яратилмаганида. «Бизда ислоҳот дейилган йилларда айни шу вазифа уддаланмади. Бозор пайдо бўлса, электр энергияси қиммат бўлиши ҳам, арзон бўлиши ҳам мумкин. Лекин дефицит бўлмаслиги аниқ. Грузия айни шу ишни уддалади», — деб ёзади блогер.
Изоҳ (0)