АОКАда COVID-19’га қарши вакциналарнинг аҳоли саломатлигига таъсирига бағишланган матбуот анжумани ўтказилди.
Фото: «Дарё» / Мадина Нурман
Анжуманда Коронавирусга қарши курашиш штаби аъзоси Нурмат Отабековнинг маълум қилишича, Ўзбекистонда 21 миллион фуқарони эмлаш режалаштирилган.
«Биз шу кунга қадар 1 миллион 34 минг кишини тўлиқ эмлаб бўлдик. Вакцина қабул қилган инсонларнинг жами сони эса 6 миллион нафардан ошди (бу рақам ичида бир, икки ва уч марта вакцина олганлар бор).
Ўзбекистонда бугунги кунда 4,1 мингта эмлаш пунктлари фаолият кўрсатяпти. Афсуски, биз бир кунда битта пунктда 19 кишинигина эмлаяпмиз, холос. Аслида эса, имкониятимиз кунига 70 одамни эмлашга етади», — дея таъкидлади Отабеков.
Маълумот учун, 22 июль ҳолатига кўра, Ўзбекистонда коронавирусга қарши жами 5 945 130 доза вакцинадан фойдаланилган, уларнинг 1 572 483 дозаси иккинчи ва 592 938 дозаси учинчи босқичда қўлланилган. Шунга кўра, мамлакатда жами эмланганлар сони 3 779 709 кишини ташкил этмоқда.
Жами эмлашлар бўйича юқори кўрсаткичлар:
- Наманган вилоятида 789 334 доза,
- Фарғона вилоятида 761 953 доза,
- Андижон вилоятида 663 635 дозани ташкил қилмоқда.
Бундан аввал ижтимоий тармоқларда вакцина бўйича саволлар билан юзланган профессор видеоси юзасидан Инновацион ривожланиш вазирлиги баёнот бергани, Ўзбекистонга яна 1 млн доза ZF-UZ-VAC2001 вакцинаси олиб келингани ҳамда ЖССТ эмизикли оналарга COVID-19’га қарши эмланишни тавсия қилгани ҳақида хабар берилганди.
