«Женоа» ҳужумчиси Элдор Шомуродовга «Рома» қизиқиш билдиряпти.
Il Tempo’нинг хабарига кўра, 26 ёшли ҳужумчи римликларнинг бош директори Тиагу Пинтунинг назарига тушган. Римликлар бу борада «Женоа» билан алоқага чиққан, футболчининг нархи тахминан 15 миллион евро бўлиши кутилмоқда. Шунингдек, генуяликлар футболчининг кейинги трансферидан улушга эга бўлмоқчи.
Шомуродов ижара асосида «Рома»га ўтиши ҳам мумкин. Римликлар ушбу трансферга Жозе Моуриньо режасига кирмаётган Педрони қўшиш эҳтимоли бор. Агарда расмий таклиф билдирилса, «Женоа» бу ҳақида ўйлаб кўради.
Аввал ҳам «Рома»дан Шомуродовга қизиқиш бўлгани ва буни Моуриньонинг шахсан ўзи истаётгани ҳақида хабарлар янграганди. Бироқ футболчининг агентлари бу хабарлар ҳақиқатга тўғри келмаслиги ҳақида маълум қилганди. 2020 йилнинг январь ойида Элдорга «Ювентус»дан қизиқиш бўлганди. Аввалроқ «Женоа» бош мураббийи Давиде Баллардини раҳбариятга 26 ёшли футболчини сотишни тақиқлагани ҳақида хабар қилинганди.
Ўзбекистонлик ҳужумчи 2020/21 йилги мавсум А Серияда 31 ўйинда майдонга тушиб, 8 та гол муаллифига айланганди.
Изоҳ (0)