Andijon shahrida olti oydan buyon itlarni so‘yib, ularning go‘shtini iste’mol qilish bilan shug‘ullanib kelgan shaxs ushlandi, deb xabar berdi viloyat IIB matbuot xizmati.
Ma’lum qilinishicha, 26-iyun Andijon shahar SEO va JSXga shahardagi “O‘zgarish” MFYda yashovchi fuqarolar tomonidan mahallada it so‘yish bilan shug‘ullanayotgan shaxs borligi haqida murojaat kelib tushgan.
Murojaatga ko‘ra, mahallaning T.Keldiyev ko‘chasi 75-uyda yashovchi O.G‘.ning yashash xonadoni borib o‘rganilgan. O‘rganish davomida fuqaro o‘z xonadonida jami 12 ta itni boqish qoidalarini buzgan holda saqlab kelayotgani aniqlangan hamda u yerdan itning terisi va suyaklari topilgan.
Qayd etilishicha, O.G‘ oxirgi olti oydan buyon o‘zining iste’moli uchun itlarni so‘yib, go‘shtini iste’mol qilib kelgan, ammo it go‘shtini go‘sht mahsuloti sifatida biron bir shaxsga sotmagan va topshirmagan.
Ish bo‘yicha to‘plangan hujjatlardan kelib chiqib, O.G‘. Ma’muriy javobgarlik to‘g‘risidagi kodeksning 110-moddasi (it va mushuk boqish qoidalarini buzish) va 111-moddasi (hayvonlarga nisbatan shafqatsiz munosabatda bo‘lish) 1-qismlarida nazarda tutilgan huquqbuzarliklarni sodir etgan deb topilib, unga nisbatan ma’muriy bayonnoma rasmiylashtirilgan.
Hozirda O.G‘.dan huquqbuzarligi yuzasidan belgilangan jarimani undirish choralari ko‘rilmoqda.
Eslatib o‘tamiz, aprel boshlarida Qashqadaryoda uyida eshak so‘yib sotayotgan shaxslar aniqlangan edi.
Izoh (0)