Тожикистон президенти Эмомали Раҳмоннинг синглиси — 64 ёшли Қурбонби Раҳмонова 20 июль куни ҳаётдан кўз юмди. Бу ҳақда давлат раҳбарининг матбуот хизмати хабар бермоқда.
Asia-Plus Тожикистон Соғлиқни сақлаш вазирлигидаги манбаларига таяниб ёзишича, Қурбонби Раҳмонова коронавирусга чалинган ва Душанбедаги 5-касалхонада даволанаётган эди.
Дафн маросими 21 июль куни Данғара шаҳарчасида бўлиб ўтади.
Тожикистон ҳукумати Эмомали Раҳмонга, унинг қариндош ва яқинларига Қурбонби Раҳмонованинг вафоти муносабати билан ҳамдардлик билдирди.
Қурбонби Раҳмонова «Ўрмон хўжалиги ва овчилик» ДУК раҳбари Холмўмин Сафаровнинг рафиқаси бўлган, унинг ўзи эса 2012 йил июнида ўлдирилган эди.
Нашр эслатишича, Тожикистон президентининг онаси — 88 ёшли Ўзбекби Асадуллаева 5 июль куни коронавирусдан вафот этган эди.
Тожикистонда 2021 йилнинг 11 январидан буён коронавирусга чалиниш бўйича бирор-бир расмий ҳолат қайд этилмаган. 26 январь куни президент Эмомали Раҳмон мамлакат коронавирус устидан ғалаба қозонганини эълон қилган, шу билан бирга, аҳолини ниқоб режимига риоя қилиш ва масофа сақлашни унутмасликка чақирган.
Июнь ойи бошида ОАВда Тожикистонда коронавирус қайтадан авж олгани ҳақида хабарлар тарқалди. Соғлиқни сақлаш вазирлиги эса буни қатъиян рад этди ва хабарларни фақатгина миш-миш деб атади.
Кейинроқ Тожикистонда коронавирусга чалиниш ҳолатлари ҳақида расман маълум қилинди. Шу муносабат билан, мамлакатнинг ҳар бир фуқаросидан ушбу соҳадаги мутахассисларнинг тавсияларига қатъий амал қилиш, зарурат бўлмаган жойга бормаслик, жамоат жойларида ниқобдан ва бошқа дезинфекцияловчи воситалардан фойдаланиш талаб этилади.
Июль ойи бошида Тожикистонда вояга етган аҳоли учун COVID-19’га қарши эмланиш мажбурий этиб белгиланди.
Изоҳ (0)