Мали президенти вазифасини вақтинча бажарувчи, полковник Ассими Гойтага мамлакат пойтахти Бамакодаги масжидда суиқасд уюштирилди. Бу ҳақда AFP хабар қилди.
Агентлик ахборотига кўра, икки нафар қуролланган эркак Гойтага ҳужум қилган, улардан бирининг қўлидан пичоқ бўлган. Мали президенти масжидга Қурбон ҳайити намозини ўқиш ва қурбонлик маросимида иштирок этиш учун борган.
AFP масжид хизматчиларидан бирининг маълумотига таяниб, ҳужум қилган эркакнинг президентга ортдан туриб пичоқ уришга ҳаракат қилгани, пичоқ зарби Гойтага эмас бошқа бир одамга тегганини аниқлаган.
2020 йил август ойида Гоита Малидаги ҳарбий тўнтариш ва президент Иброҳим Бубакар Кейта ҳукуматдан узоқлаштирилганидан кейин миллий қутқарув комиссияси раисига айланганди. 2021 йил май ойида ҳарбийлар Малининг вақтинчалик президенти Бах Ндау ҳамда бош вазир Моктар Уанни ҳибсга олди. Ушбу воқеадан маълум вақт ўтгач улар истеъфо берди.
Май охирида Мали Конституцион суди полковник Ассими Гойтани мамлакатнинг вақтинчалик президенти деб эълон қилган.
Аввал Афғонистонда Ҳайит намози ўқилаётган вақтда мамлакат президенти Ашраф Ғани резиденцияси яқинига ракета зарбалари йўллангани хабар қилинганди.
Эслатиб ўтамиз, июль бошида Гаити президенти Жовенел Моиз ўз қароргоҳида отиб ўлдирилганди.
Изоҳ (0)