НАТО бош котиби лавозимига кейинги йил Шарқий Европадан уч нафар аёл сиёсатчи даъвогарлик қилиши мумкин, деб ёзади Politico.
НАТОнинг амалдаги бош котиби Йенс Столтенбергнинг ваколати 2022 йил сентябрда тугайди. Нашрнинг таъкидлашича, бир қатор расмийлар, дипломатлар ва таҳлилчилар 72 йилдан буён фаолият юритиб келаётган альянснинг бош лавозимига аёл кишини тайинлаш вақти келди, деб ҳисоблайди. Бошқаларнинг таъкидлашича, Россия билан қарама-қаршиликни ҳисобга олган ҳолда, номзод Шарқий Европадан бўлиши керак, уларнинг фикрига кўра, бу Москва учун муҳим сигнал бўлади.
«Ушбу икки шарт бирлаштирилса, потенциал номзодлар рўйхатидан учта ном дарҳол биринчи ўринга чиқиб қолади: Хорватия ва Литванинг собиқ президентлари Колинда Грабар-Китарович ва Даля Грибаускайте ҳамда Эстониянинг амалдаги президенти Керсти Калюлайд», — деб ёзади Politico.
НАТОдаги собиқ элчининг нашрга айтишича, Буюк Британия Brexit’дан кейин ҳам ўз таъсирини намойиш этиш учун бош котиб лавозимига ўз номзодини фаол равишда тарғиб қилиши кутилмоқда. Politico хабарига кўра, собиқ бош вазир Тереза Мей, шунингдек, амалдаги бош вазир Борис Жонсоннинг миллий хавфсизлик бўйича собиқ маслаҳатчиси ва Буюк Британия ҳукуматининг собиқ котиби Марк Седвилл Британиядан номзодлар сифатида муҳокама қилинмоқда.
Бироқ, дипломатлар номзоднинг малакаси унинг миллатига қараганда анча муҳим омил бўлишини таъкидлаган, деб ёзади Politico. Мей Brexit пайтида менежмент ва коммуникатив қобилиятлари учун танқид қилинган, Седвилл эса ҳеч қачон ташқи ишлар ёки мудофаа вазири сифатида ишламаган, бу НАТО раҳбари учун қўйиладиган минимал талаб.
Столтенбергнинг ўрнини босувчи шахс келаси йил баҳорнинг охири ёки ёзнинг бошида бўлиб ўтадиган НАТО саммитида маълум қилиниши кутилмоқда.
Йенс Столтенберг 1990 йилларда аввал Норвегиянинг савдо ва энергетика вазири, сўнгра молия вазири бўлиб ишлаган. Икки марта мамлакат ҳукуматини бошқарган. У 2014 йилда НАТО бош котиби лавозимини эгаллаган.
Колинда Грабар-Китарович 2015 йилдан 2020 йилгача Хорватия президенти бўлган. Бунгача у ташқи ишлар ва Европа билан интеграция вазири, Хорватиянинг АҚШдаги элчиси ва НАТО бош котибининг жамоат дипломатияси бўйича ёрдамчиси бўлиб ишлаган.
Даля Грибаускайте 2009 йилдан 2019 йилгача Литва президенти бўлган. 2000 йилларнинг бошларида у молия вазири бўлиб ишлаган, кейинчалик Европа Комиссиясининг таълим ва маданият бўйича кейинроқ эса бюджет ва молиявий режалаштириш бўйича комиссари сифатида фаолият олиб борган.
Керсти Калюлайд 2004 йилдан 2016 йилгача Эстониянинг Европа ҳисоб палатасидаги вакили бўлган, 2016 йилдан буён мамлакат президенти. Аввалроқ БМТ Эстония президентини аёллар ва болалар ҳуқуқларининг глобал ҳимоячиси этиб тайинлаганди.
Изоҳ (0)