Vivo компанияси иккита янги смартфони — Vivo S10 ва S10 Pro’ни тақдим этди. Янги моделлар ингичка ҳошияли ўзига хос дизайн, иккита фронтал камераси, учта чақноқи ва қуёш нури таъсирида рангини ўзгартиришга қодир корпуси билан ажралиб туради, деб хабар беради «Afisha.uz».
Смартфонлар 90 герцли янгиланиш частотасига эга Full HD+ сифатни қўллаб-қувватловчи 6,44 дюймли экранларга эга бўлган. Бармоқ изи сканери дисплей остида жойлашган. Аппарат оқ, лайм, қора ва градиент рангларда тақдим этилади, бироқ ишлаб чиқарувчи асосий эътиборини охирги вариантга қаратган. У қуёш нурида рангини ўзгартиришга қодир махсус фотохром қатлам билан қопланган.
Vivo S10 ва S10 Pro ичига MediaTek Dimensity 1100 процессорлари ўрнатилган. S10’нинг тезкор хотираси 8 гигабайтни, ички хотираси эса 128/256 гигабайтни ташкил этади. S10 Pro модели 12 гигабайт тезкор ҳамда 256 гигабайт ички хотирага эга бўлган. Аккумуляторлар сиғими 4050 мА/соатга тенг бўлиб, 44 ваттли тезкор қувватланиш функцияси мавжуд. Катта модель NFC-модулга эга бўлган.
Смартфонлардаги камералар сони бешта: Pro-версияда 108 мегапикселли асосий (S10 да 64 Мп), 8 мегапикселли кенг бурчак, 2 мегапикселли макро-модуль, 44 мегапикселли асосий фронтал ҳамда 8 мегапикселли кенг бурчакли фронтал. Шунингдек, Vivo блогерлар учун махсус иккита фронтал чақноқни ҳам ўрнатган бўлиб, у қоронғи шароитда ҳам юзни ёритишга хизмат қилади.
Хитойда смартфонлар 23 июлдан бошлаб сотувга чиқади. Расмий нархи:
- Vivo S10 8/128 Гб — 418 доллар;
- Vivo S10 8/256 Гб — 464 доллар;
- Vivo S10 Pro 12/256 Гб — 525 доллар.
Изоҳ (0)